Land Custom Station hawn a ni Item 62-ah insumdawn tawn a ni dawn

Zokhawthara Land Custom Station chu nimin khan Union Minister of State for Commerce & Industry Nirmala Sitharaman-i'n a hawng. He station kaltlang hian India leh Myanmar-te chu thil chi hrang 62-ah an insumdawn tawn thei dawn a ni.

"May 2014-a sorkarna kan siam tirh aṭangin prime minister Narendra Modi duh danin hmarchhak state-te chu rang taka an harsatnate leh mamawhte a hmun ngeia kala ngaihven nghal tura tih kan ni," a ti a; Union minister zawng zawngte chu tih tur angte bawhzui thuai a, thil thar awmte rang taka chingfel nghal tura hrilh an nih thu a sawi.

Nirmala Sitharaman chuan, BJP kaihruai Central sorkara minister-te zinga Mizoram tlawh hmasa ber a nih chu lawmawm a tih thu a sawi a; hmarchhak state thil reng reng chu ‘mission mode’ a kalpui tur a ni tih sawiin, "Tunah hian Delhi ngaihtuaha chinfel mai theih tur chite pawh a hmunah ngei kala bawhzui tura tih kan nih angin, tun hma ai chuan Union minister-te hi hmarchhakah an lo kal zing hle tawh a ni... Mission mode-a kalpui tur a nih angin he laiah bank leh dâk-inte pawh V/C-te'n ka hnena an rawn thlen angin ka lo bawhzui ang," a ti.

Zokhawthar Land Custom Station chu hawn theiha peih felna a rei tawh thu sawiin, Nir­mala Sitharaman chuan, mamawh engkim dah a nih tawh thu a sawi a, "Myanmar nena insumdawn tawnna tur chi hrang hrangte chinfel vek tawh a ni a, India aṭang thawn chhuah tur zinga 90%-ah chhiah chawi a ni dawn lo," a ti.

Nirmala Sitharaman chuan, India leh Myanmar inremna ziah chu July 2015 aṭangin a taka kalpui ṭan a nih tur thu a sawi a, "Ministry of Commerce chuan a theihna apiangah Mizoram sorkar ṭanpui a inpeih reng dawn a ni," a ti. Myanmar leh India insumdawn tawnna hlut záwng chu US dollar tluklehdingawn 2.28 vel nia a hriat thu leh Kaladan Muti Modal Transit Transport Project pawh chak zawka kalpui an tum thu a sawi bawk.

Chief minister Lal Thanhawla pawhin thu sawiin, Zokhawthar Land Custom Station hawng tura Niramala Sitharaman a rawn kal avangin lawmawm a tih thu a sawi a, "Mizoram sorkarin agriculture lama kan thar chhuahte thawn chhuah theih dan tur a ngai pawimawh a, Zokhawthar Land Customs Station hi ram pahnihte tan hmasawnna thlentu a nih ngei ka beisei," a ti.

Lal Thanhawla chuan, Far­kawn, Vaphai (Saikhumphai), Sangau (Saisihchhuah) leh Thingsaiahte border trade centre din tum mek a nih thu leh, Hnahlan-Darkhai, Zote-Fartlang, Vaphai-Leilet leh Pangkhua-Thantlangahte Weekly Haat (kar tin bazar) neih theihna turin India leh Myanmar sorkarin inremna an siam tawh thu a sawi bawk.

Trade & Commerce minister H Rohluna chuan, Zokhawthar Land Customs Station chu India leh Myanmar ram ei leh bar dinhmun tihṭhatna thlentu leh inunauna ṭha zawk siamtu a nih ngei a beisei thu a sawi.

Union Minister hi Ministry of Commerce-a joint secretary Ravi Kapoor-in a ṭawiawm a; Land Customs Station hawnnah hian parliamentary secretary Joseph Lalhimpuia, Mizoram Youth Commission chairman T Sangkunga leh MLA Lalrinliana Sailo-te an tel.

Mandalay-a Indian Consul General Dr Nanda Kumar hoin Myanmar sorkar aṭangin official 19 an tel bawk.

Zokhawthar Land Customs Station-ah hian ware house lain tawk tak, quarters leh rest house-te a awm a; weighbridge, plant quarantine building leh toll-gate te a awm bawk. He hmun kaltlang hian dan angin India leh Myanmar chu thil chi hrang (commodity) 62-ah an insumdawn tawn thei dawn a ni.