VIP-te MR kawl zat tihtlem tum a ni

Finance minister Lal­sawta chuan, Council of Minister leh parliamentary secretary-te'n muster roll an rawih theih zat tihtlem tum a nih thu leh, Governor, Chief Minister leh Assembly Speaker-te bak thlawhtheihnaah executive class-a chuang lo tura tih an nih thu House a hrilh.

MNF member Lal­ruat­kima zawhna chhang­in Finance Minister chuan, Mizoram sorkarin sum harsatna a hmachhawn mekah kawng hrang hrangin hma a la reng tih sawiin, "A khát tâwkin department-te zawm tur instruction chhuah ṭhin a ni. Inrenchemna atana kaihhruaina office memorandum (OM) pawh Finance department-in July 8, 2014-ah a chhuah a, CMO aṭang pawhin OM hi December 23, 2014 khan chhuah a ni," a ti a; sum lak luh belhna tur ngaihtuah zel a nih thu a sawi.

Inrenchemna kawng­ah sorkar hnathawk leh mipuia bul ṭan ringawt a tâwk lo tih sawiin, Lalsawta chuan, "Keini lamin bul kan ṭan a pawi­mawh. Inrenchemna leh sum hmuh belhna atana hmalaknaah hian ram tan inhrêk kan huam a ni," a ti.

Finance Minister chuan, tun dinhmunah sorkarin leibá a neih zat chiah hriat theih a la ni lo tih sawiin, "Kan account vawngtu accoun­tant general-in min la rawn hrilh lo. Hmasawn tur chuan bat a ngai a ni," a ti a; Finance Accounts-in kum 2012-2013 a Mizoram leiba a tarlan zat chu cheng vbc. 5114.21 a nih thu a sawi.

Ram changkang nia sawi ṭhinah mipuiin chhiah an pek tam thu sawiin Lalsawta chuan, "Finance department ngaihtuahna lian ber chu mipui satliah deuh tana pek harsa lo tur, a nei deuhte tana pek nuam tur a ni," a ti.