SSA-a mite'n sikul hun sawn hma ṭha an ti

SSA Employees' of Association of Mizoram (SEAM) chuan thuchhuah siamin, sorkarin kum 2015-16 academic session aṭanga sikul kai hun sawn hma a tum chu ṭha an tih thu leh an thlawp tlat thu an tarlang.

SEAM chuan, "Sorkar beisei anga sikul kai hun tihdanglam hi hlawhtling taka hman a nih theih nan nu leh pa, naupang leh zirtirtu zawng zawngte lo insiamrem a, zawm ṭheuh ni se," an ti.

SEAM chuan, Mizoram RMSA hnuaia laboratory attendant leh clerk 366-te chawlhtir tumna a awm chu pawi an tih thu tarlangin, Mizoram sorkarin chhawr chhunzawm dan ngaihtuah se an duh thu an sawi a, "Chhungkaw châwm nana lo hmang tawh leh hna dang beisei tawh lote an nih hlawm avangin sorkar chak tak hian chhawr chhunzawm dan ngaihtuahsak hram se kan ti hle. Hemi kawnga Mizoram RMSA Employees’ Welfare Association (MIREWA) hmalakna hi kan thlawp tlat a ni," an ti.

Mizoram sorkarin sum harsatna a tawh mek laia financial year 2015-16 aṭanga Mizoram SSA sum Central-in a zavaia a tum vek tawh tur chu lawmawm an tih thu an sawi bawk.