Food Security la hman loh chhan sawifiah
Food, Civil Supplies & Consumer Affairs minister John Rotluangliana chuan, Food Security Act (FSA) hman a nih hunah ration la thei lo tur an tam dawn thu sawiin, mipui ngaihtuahna avangin Mizoramah hman a la nih rih loh thu House a hrilh.
MNF member Lalrinawma zawhna kal zelah Supply Minister chuan, FSA chu sorkarin a hmang ngam lo nia sawite a awm ṭhin tih sawiin, "FSA hi hmang ila sorkar tan chuan a zangkhai thlak daih zawk dawn. FSA hian mi 7,06,296 chiah a huam thei dawn a, a huam loh zawngte chuan ration buhfai an la thei tawh dawn lo a, chuvangin kan hmang duh hrih lo," a ti.
John Rotluangliana sawi danin, FSA-in a huam tur mi 7,06296 chu kum 2011 chhiarpui aṭanga chhûtin Mizoram mipui aṭanga 64.30% an ni. Tun dinhmunah thingtlangah mi pakhatin thla khatah ration buhfai kg. 8 zel an la thei a, FSA hnuaiah chuan mi pakhatin thla khatah buhfai kg. khat Rs. 3 hisápin kg. 5 chiah an dawng thei dawn. FSA-in a huam lohte chuan ration buhfai an la thei dawn lo a, FSA-in a huamte pawhin an quota an kham loh chuan a man toa an lei a ngai dawn a ni.