Assembly session zawh a ni Bill pasarih pawm; zawhna 37 chháng

Mizoram Legislative Assem­bly pasarihnaa session vawi nga­na, March 17, 2015-a ṭan chu nimin khan zawh a ni. Ses­sion-ah hian Bill pali pass a ni a, House-a chhan chi zawhna (star­red question) 37 chhan hman niin, unstarred question 17 chhan a ni bawk.

Session-ah hian March 24 khan dan thar, The Mizoram Right to Public Services Bill, 2015, chief minister Lal Thanhawla put luh leh, Law & Judicial minister Lalsawta'n dan ding lai siam ṭhatna tur, The Mizoram Compulsory Registration of Marriages (Amendment) Bill, 2015 a put luhte chu pass a ni.

CM Lal Thanhawla chuan The Mizoram Right to Public Services Bill, 2015 a sawifiah a; ram khua leh tuite mamawh hrêng khawtlai loa sorkar department-te'n hun tiam chhunga an pekna tur te, lang tlang theia sorkar hnathawh dan siamna tur te, eirûkna ûm bona tur te, sorkar ṭha leh rintlak a awm theihna turte a nih thu a sawi a, "He dan hman avang hian sorkarin sum sên belh tur a nei lo a ni," a ti.

Lal Thanhawla sawi danin, dan thar hi hman a nih hunah chuan, miin lungawi lohna a neih­a vuivaina a thlenna turin First Appellate Authority leh Second Appellate Authority a awm dawn a; Appellate Authority-in thil dik lo tia a ngaihte chu Rs. 500 aia tlem lo leh Rs. 5,000 aia tam lo a chawitir thei dawn a ni.

Law minister Lalsawta chuan The Mizoram Compulsory Registration of Marriages (Amendment) Bill, 2015 a sawifiah a; "Nupa inṭhen leh tam tak an awm avangin sorkar hnathawk zingah nupuite leh fate châwmna pek phûtna vangin thubuai tam tak a awm a... hnam dang zingah nupui pakhat aia tam nei te, naupan laia inneihtirte a awm bawk avangin he dan hi siamṭhat a ngai a ni," a ti.

Nimin khan UD&PA minister Zodintluanga put luh, The Mizoram Municipalities (Second Amendment) Bill 2015 leh LE&IT minister Lalrinmawia Ralte put luh, The Mizoram Youth Commission (Amendment) Bill 2015-te pass a ni.

The Mizoram Municipalities (Second Amendment) Bill 2015 pu luttu Zodintluanga chuan, kum 2007-a dan siam a nih hnuah, November 2010-ah Aizawl Municipal Council din a ni a; JNNURM leh Rajiv Awas Yojana hman a nih hnuah khawpui mipuite mamawh pekna leh inrelbawlna kawngah thil danglam tam tak a awm avang te, dan hman lai a famkim tawk loh vangtein dan chu siam ṭhat a ngai niin a sawi. Dan siamṭhatah hian, AMC councillor-te MLA/MP-ah thlan tlin an nih chuan, councillor an nihna a tawp nghal tawh dawn a ni.

LE&IT minister Lalrinmawia Ralte chuan, Mizoram Youth Commission Act hman a nih hnuah, India ram puma thil awm dan inthlak danglam zel vang te, skill development lam uar a nih tak vangtein danah chaun belh leh paih ngai a awm thu a sawi a; chuvang chuan dan tihdanglam rawtna an thlen ta tih a sawi a ni.

Assembly session hi nimin chawhnu dar 1:10 khan tiamchin awm loa tihtawp a ni a; session tihtawp a nih hmain speaker Hiphei chuan tun ṭum session chhunga an thil tihte a sawi. Tun ṭum session-ah hian starred question 125 lutin, 122 pawm a ni a, House-ah zawhna 37 chhan hman a ni. Unstarred question 22 lut zinga 17 pawm a ni a, chhan vek a ni.

Private member resolution lut 35 zingah INC member T Sangkunga put luh, ''Zofate inpumkhatna dâltu chu engmah tih ni lo rawh se' tih chu pawm a ni a; House dawhkanah lehkha pawimawh 13 leh report 11 pharh a ni bawk.