Kuminah MIMER ṭan hman hrâm tum

Health minister Lal Thanzara chuan, Mizoram Institute of Medical Education Reserch (MIMER) chu kuminah ṭan hman hrâm tum a nih thu Assembly House a hrilh.

MNF member Dr K Beichhua zawhna chhangin Lal Thanzara chuan, "MIMER hi seat 50-a ṭan tum ni mah se, Ministry of Health-in seat 100 tala ṭan an phût avang­in seat 100-a ṭan kan tum. Seat 100-a ṭan a nih dawn chuan State Referral Hospital hi khum 300-a tihlen a ngaih dawn bakah, hostel mi 50 len theihna tura ruahman tawh pawh mi 100 len theihna tura siamṭhat a ngai dawn a ni," a ti.

Health Minister sawi danin, MIMER atan hian director tur thlan a ni tawh a, staff dang pawh hauh lâwk (earmarked) an ni tawh. MIMER-ah hian seat 15% chu Central-in an hauh a ni.

MIMER dinna atan sorkar laipui aṭangin pawisa hmuh a la ni lo tih sawiin Lal Thanzara chuan, "Sorkar laipui tum tur hi cheng vbc. 189 a ni a, tun dinhmun­ah pawisa la dawng lo mah ila, hmuh harsa lo turah kan ngai. State-in a tum ve tur pawh min la pe thei lo a, hei pawh hi hmuh a harsat a rinawm loh," a ti.

Zawh belhna chhangin Health Minister chuan, Aizawl Civil Hospital aṭangin State Referral Hospital-ah department pariat sawn a ni tawh tih sawiin, "Doctor pawh an awm thlap tawh a ni," a ti a; Refferal Hospital-a bus service tir turin Transport department an dil mek thu a sawi.

MNF member Lalruatkima'n Health department-in tun hnaiah hmingchhiat­na an neih zeuh zeuh avanga ṭan lâk a ngaih thu a sawi chhungchangah Lal Thanzara chuan, "Health department hi mi tin ngaihven hlawh leh nghawng thei a ni a, he department anga meeting neih ngun pawh an awm lo mai thei. Hetiang a ni chung hian theihtawp kan chhuah zel ang," a ti.