Sorkar laipui palzût kan duh lo - Zira

Home minister R Lalzirliana chuan MNF member Lalruatkima zawhna chhangin, Union Home minister Rajnath Singh-a'n February 2015-a Bru chungchanga Kanchanpur, Tripura a tlawh ṭuma chief minister Lal Thanhawla a kal loh chhan chu inpalzût an duh loh vang a nih thu a sawi.

R Lalzirliana chuan, "Union Home Minister-in Tripura a tlawh dawn khan chawpchilh takin, ni khat vel a la awm tihah Chief Minister kal ve turin an rawn sáwm a; mahse, CM hi hmun danga a awm lai a nih avang leh khatianga inpal mai mai kan duh loh avangin a kal lo," a ti.

Home Minister-in a sawi danin, Bru Coordination Committee-in August 30, 2010-a North Tripura district-a refugee camp paruka chhiarpui an neih Mizoram sorkara an thehluh dan chuan, Tripura refugee camp-ah hian chhungkaw 5,481-ah mihring 29,625 an awm. Mi 29,625 zingah Mizoram electoral roll-a chuang chu mi 11,014 an ni.

R Lalzirliana chuan, January 1, 2015-a Supreme Court thutlukna ang­in Mizoram sorkar chuan Bru-te thla ruk chhunga la let turin Road Map-IV a siam tih sawiin, "Road Map IV hi Supreme Court-in ṭha a ti a, Ministry of Home Affairs-in pawisa min pek hnuah hmalak ṭan a ni ang," a ti a; Road Map anga Bru lak letna tura hmalakna chu March 3, 2015-ah ṭan tawh a ni tih a sawi.

MHA-in January 30, 2015-a Mizoram leh Tripura sorkar aiawhte a koh ṭumin Mizoram sorkar hmalaknaa thla ruk chhung­a Bru Mizorama kîr duh lote chu Tripura-a chêng ngheta ngaih tawh tura thu a tihtluk a nih thu sawiin, R Lal­zirliana chuan, "Bru lak let turte hi Mizoram khua leh tui dik tak an nih leh nih loh finfiahna atan Mizoram Electoral Roll, 2005 hman a ni ang," a ti.