Hnam dang sumdawng dawr 11 khârsak

MZP chuan nimin khan Khatla leh Tennis Court bul vela dan loa hnamdang sumdawngte dap hna an thawk a, hnam dang dan loa sumdawng mi 11-te dawr an khârsak.

MZP hian nikuma an General Assembly-ah 'Mizoram chhunga hnam dang dan loa sumdawngte dapchhuah a, a ṭul anga hmalak ni rawh se' tiin an lo rel tawh a, chumi bawhzui chuan dan loa hnam dang sumdawngte zawn hna an thawk ta a ni.

MZP-in dan loa hnam dang sumdawng an mante chu Mizo hming hawha sumdawng leh sumdawn phalna nei lote an ni a; nimina dawr an khârsakte chu - SL Sailo (tailoring), Misin Ali (tailoring), Nazim Uddin (tailoring), Mozin Uddin (supari dawr), Gautam (lumehna), Salik Uddin (thingpui dawr), Devendra Chawndraw (lumehna), Sombu Chauda (lumehna), Abdul Zalil (eichawp dawr), Rafika (thingpui dawr) leh National Hardware (iron rod dawr)-te a ni.

MZP chuan thuchhuah siamin, Mizorama dan loa hnam dang sumdawngte leh Mizo hming hawha sumdawngte dap chhuah hna an thawk zel dawn tih an sawi a, "Hnam dang dan loa sumdawngte dap chhuah kawngah Mizo mipuite thlawpna kan ngen a ni," an ti.