CM-in Zofate Thlangtlak Gate a hawng

Vangchhia-a Kawtchhuah Ropui luhnaa 'Zofate Thlang­tlak Gate' siam thar chu nimin khan chief minister Lal Thanhawla'n a hawng. Lal Thanhawla chuan, hnamin hma a sâwnna atan insuihkhawm a pawimawh thu a sawi.

Chief Minister chuan ṭhang­tharte'n pipúte sûlhnû ngaihsan nachang an hre chho zel tih sawiin, "Thlahtu bul ngaihsan nachang hre lo hnam chu hnam boral tur an ni. Vangchhia leh a chhehvel khuate hi pipúte sûlhnû tamna a nih avangin Mizo mipuite tan hmun pawimawh a ni chho zel ang," a ti.

Mizo pipuite sûlhnû chu uluk taka humhalh a ngai tih sawiin, Lal Thanhawla chuan, a nihna leh hlutna tibo vek khawpa cheibâwl erawh thil zahthlak tak a nih thu a tarlang.

Chief Minister chuan, "Mizo mipuite ei leh bar leh sum leh paia kan intodelh a pawi­mawh. Kan rama siamṭhat ngai zawng zawngte siamṭha turin rinawmna, taimakna leh dikna nen, duhamna leh hmasialna tel loin, ram leilung fate'n kan zavaiin mawhphurhna kan nei a ni," a ti.

Khualzahawm, bialtu MLA T Sangkunga pawhin thu sawiin, sorkarin pipute sûlhnû humhalh nan theihtawp a chhuah thu a sawi a, "Hmun pawimawhte hi hlut nachang kan hriat zual zel a pawimawh a ni," tiin, Vang­chhia khuain pipute sûlhnû an humhalh chu a khaw mipuite tan inchhuanna tham a nih thu a sawi.

Zofate Thlangtlak Gate hawnna hi INTACH, Mizoram Chapter leh Vangchhia khaw­tlangin an buatsaih a ni a, CM nupui Lal Riliani'n souvenir 'Pipute Lamlian' tih a tlangzarh. Vawiinah a lawmna hun hman chhunzawm a ni dawn a, mithiam­te'n thu an sawi dawn a ni.

Zofate Thlangtlak Gate sak nan hian khawtlang mipuite'n cheng nuai li an thawh khawm a, kawng hrang hrang aṭangin cheng nuai hnih vel an hmuh belh bakah, hnatlang tha eng emaw zat sên a ni.

Kawtchhuah Ropui hi Ministry of Culture-in Adarsh Monument-ah an puang a, Archaeological Survey of India (ASI)-in National Importance-ah an lo puang tawh bawk.