Padma Shri dawngtu Khawlkungi a thi

Thu leh hla lama a thawh ṭhat vanga Pad­ma Shri dawngtu, Khawl­kungi (87) w/o Bual­khuma (L), Mission Veng­thlang chu nimin zing dar 7 khan New Life Hospital-ah a thi a, chawhnu dar 3 khan vûi a ni.

Khawlkungi hi Sep­tember 14, 1927-ah a piang a, January 23, 1960-ah Bualkhuma nen inneiin, fa pali an nei. Zirna lamah pawl ruk thleng a zir a, kum 1941-ah First Lushai Company-ah lutin, kum 1944-ah Air Force-ah clerk hna a thawk leh a; kum 1958-ah PWD-ah clerk hna a zawm a, kum 1991 khan a pension a ni.

Khawlkungi hi thu ziak mi a ni a, Mizote zinga thu leh hla lama thawh hlawk ber pawl a ni. Thawnthu 26 a ziak a, chung zingah chuan - Sangi Rinawmna (1978), Zawlpala Thlan Tlang (1977), Duhtak Sangpuii (1998) tihte a tel. ‘Zawlpala Thlantlang’ tih chu college zirlaiah telh a ni.

Lehkhabu ṭhahnem tak a letling a, chung zingah chuan - Darjeeling Disaster (1979), Oliver Twist (1983), The other side of midnight, The Prince and the Pauper, DL Moody tihte a tel. Lemchan thawnthu pawh 38 a ziak a, chung zingah chuan - Pangpar Báwm (1972), Genevieve (1983), Monu sual (1982) leh Sual man thihna (1989) tihte chu a lar zualte a ni.

Thu leh hla lama a thawh hlâwk avangin kum 1987-ah Padma Shri a dawng a; MAL Academy Award leh chawimawina dang ṭha­hnem tak a dawng tawh bawk a, Indigenous Writers of India-ah a chanchin telh a ni bawk.

Khawlkungi hi zun­thlum leh thisen sang vangin March 20, 2015-ah New Life Hospital-ah dah luh a ni a, nimin zing dar 7 khan a ta a ni.