UD&PA-in mi 3,290 hnenah NLUP pe tawh

UD&PA minister Zodintluanga chuan, UD&PA department-in NLUP ṭanpuina sem turin first phase aṭanga fourth phase thlengin Rs. 32,84,60,000 a dawn tawh thu leh mi 3,290 hnenah ṭanpuina pek a nih thu a tarlang.

Assembly session neih zawh taka March 25-a Lalruatkima zawh­na, UD&PA Minis­ter-in ziaka a chhan danin, UD&PA department chuan NLUP ṭanpuina sum an sem turin In­dus­tries aṭangin Rs. 4,60,60,000, kum 2013-14 allocation aṭangin Rs. 14,90,00,000 leh 2014-15 allocation aṭangin Rs. 13,34,00,000 a dawng a ni.

UD&PA chuan NLUP first phase-ah ṭan­puina sem an nei lo a, second phase-ah mi 1,431 hnenah an pe. Third phase-ah mi 1,279 an pe a, fourth phase-ah mi 580 an pe leh bawk. Second phase-a mite chu ṭanpuina an pe kim tawh a, third phase leh fourth phase-a mite chu Rs. 10,000 ṭheuh an pe tawh thung.

UD&PA hnuaiah hian NLUP-ah trade chi hrang 10 - automobile reparing, beauty parlour, desktop publishing, electronic reparing, hair cutting, knitting, leather & hood work, video & photography, show repairing leh tailoring-te a awm a ni.