Bawnghnute thar zat an phuahchawp ṭhin

Animal Husbandry & Veterinary department-in an chhinchhiah danin, NLUP bawng awm hnu, kum 2013-2014-a Mizorama bawnghnute thar chhuah zat chu tons 15,304 a ni a; NLUP bâwng awm hma kum 2007-08 leh 2008-09 chhunga bawnghnute thar chhuahte chu a tam zawk ve ve. NLUP bawng awm hmaa thar chhuah tam zawk chhan chu office-a thawktute'n dawhkan aṭanga 'data' an phuahchawp ṭhin vang nia sawi a ni.

Economic Survey, Mizoram-in a tarlan danin, kum 2007-08 ah khan Mizoramah bawnghnute tons 16,505 thar chhuah a ni a, kum 2008-09 chhungin tons16,882 thar chhuah a ni. NLUP hnuaia bawng sem hnu, kum 2013-14 chhunga bawnghnute thar chhuah chu tons 15,304 a ni a, NLUP bawng sem hma aiin a tlem zawk.

Thudawn danin, NLUP bâwng awm hnua bawnghnute thar chhuah a tlem zawk chhan hi kum 2009 hma lama survey an neih ṭhinah, indaihlohna avangin thawktute chu a hmun (field)-ah kal loin, dawhkânah rin thuin an duh zat an ziak mai ṭhin vang a ni. Dawhkan aṭanga rin thua ziah a nih avangin, kum 2007-08 leh 2008-09 chhunga bawnghnute thar zat tarlan chu rintlak a ni lo.

Kum 2008 khan Economic & Statistics aṭangin AH&Vety-ah research officer leh thawktu paruk pek an ni a, Central aṭanga phalna an hmuh angin deputy director leh thawktu dang 21 lak belh a ni bawk. Thawktu lak belh a nih hnu, kum 2008 aṭangin Livestock Census 2007 result endikna leh khaikhawm hna an thawk a, kum 2009-10 aṭangin bawng vulh leh bawnghnute dinhmun dik tak hriat tumin a hmun ngeiah an enfiah ṭan a ni.

Thlah pawlh bawng bikah kum 2007-08 a thar chhuah chu tons 12,871 a ni a, kum 2008-09 ah tons 13,019 a ni. Kum 2013-14 ah erawh chuan thlah pawlh bawng aṭanga bawnghnute thar chuah chu tons 13,629 a ni a; hei vang hian NLUP awm hnuah bawnghnute thar a tam sawt ngei niin AH&Vety hotute chuan an sawi.