Tlawng lei chim chhan chhui lo

December 8, 2014-a Sihhmui leh Lengpui inkara Tlawng lei chu a chim chhan chhui a ni lo. Hetih lai hian, lei dawh ṭhatna atan Rs. 3,03,00,000 dil a ni.

PWD hotute sawi danin, Tlawng lei chim tawh, an dawh ṭhat mek laia chim leh chu dawh laia chim a nih avangin a chim chhan chhui a ni lo a; lei dawh ṭhatna atan Ministry of Road Transport & Highways-ah January 12, 2015 khan 3,03,00,000 sanction turin an dil a ni.

Chhimtuipui lui Darzokaia lei dawh mek December 18, 2014-a chim chu contractor-in FIR an thehluh avangin chhui zui a ni a, PWD chuan police hnen aṭangin report an la dawng lo.

Lei dawh ṭhatna atan pawisa dil a awm lo a, contractor-in a dawh zawh hman loh avangin a dawh ṭhat leh hna pawh a mawhphurhna a nih thu PWD hotute chuan an sawi.