MZP-in National Games medalist-te lawmpui
MZP chuan nimin khan an Pisapuiah kumina 35th National Games 2015, Kerala-a Mizoram aiawha medal late chawimawina leh lawmpuina hun an hmang a, Mizoram State Sports Council secretary C Laltlanthanga khuallian a ni.
C Laltlanthanga chuan, MZP-in zirnaa hlawhtlingte chauh chawimawi loa infiamnaa hlawhtlingte an chawimawi tel chu lawmawm a tih thu sawiin, "Mizo hnam hi infiamna hmangin dinhmun sang takah kan dah thei a... Mizoramin infiamna lamah hma a sawn zel theih nan sorkarin theihtawpin hma a la mek a ni," a ti.
MZP president Lalhmachhuana chuan, Mizoram aiawha medal hâwntute chu MZP-in an chhuang tak zet tih sawiin, "Mizo hnam tihmingṭha chhunzawm turin thawhrimna, taimakna, thuawihna leh huaisenna nen medal tam zawk hlawh chhuak zel turin duhsakna kan hlan a ni," a ti a; infiammite chu Mizo hnam tizahawmtu nih tum turin a chah a ni.
MZP hian National Games-a champion football team member te, weightlifting-a silver medalist Lalchhanhimi, taekwondo-a silver medalist F Lalrempuii, bronze medalist Lalngaihawmi, F Lalmuansangi leh Kaplianzawni te hnenah chawimawina thuziak an hlan a ni.