Tuialhtheia chhiah tihsan avangin kum khatah vbc. 92-93 hmuh beisei

Taxation minister Dr Vanlalthlana chuan, petrol leh diesel aṭanga chhiah tihpun avangin sorkarin kum khatah cheng vbc. 92-93 vel a hmuh beisei a nih thu a sawi a; chhiah a pun avanga lirthei chuan man tisang lo turin lirthei neitute a ngen.

Petrol leh diesel aṭanga value added tax (VAT) tihpun chungchangah Taxation Minister hian nimin khan a pisaah thuthar thehdarhtute a kâwm a; petrol leh diesel man chu sang vak angin lang mah se, kum 2021-a petrol man Rs 107.12 leh diesel man Rs 97.89 nena khaikhinin tuna chhiah lak tihpun vanga a man tur chu a la hniam zawk tho thu a sawi a, "Chhiah tihpun aṭangin sorkarin kum khatah cheng vbc. 92-93 vel a hmuh kan beisei," a ti.

Taxation Minister chuan, Mizoram Resource Mobilisation Committee aṭangin petrol leh diesel man tisang tur leh November 2021-a tihhniam a nih hmaa VAT rate (petrol - 25% leh diesel - 14.55%) hmanga chhiah la leh tura ngenna Taxation department-in an dawn thu a sawi a, "Petrol leh diesel-a chhiah tihsan tawp ai chuan Road Infrastructure Cess leh Social Infrastructure Service Cess hmanga tihsan ni se kan ti," a ti.

Dr Vanlalthlana chuan, Mizoram tan petrol leh diesel aṭanga cess lak chu thil thar ni mah se, state dangah chuan hming hrang hrang hmangin an lak tawh thu a sawi a, "Cess on POL, Road Infrastructure Cess, Air Ambience Cess, etc. an la reng a, Mizoramah chuan a vawi khatna a ni," a ti a, Mizoram VAT Rules pawh tihdanglam a nih thu a sawi.

Road Infrastructure Cess chu Road Fund Act, 2007 nena kal kawpa lak a nih avangin chuta ṭanga sum hmuhte chu kawng siamna atan hman tur a nih thu a sawi a; Social Infrastructure Services Cess chu zirna-in tihchangtlunna atan te, hriselna kaihhnawiha hman atan te, skill development leh hmeichhiate chawikanna lam atantea hman tur a nih thu a sawi bawk.

Petrol leh diesel man tihsan a nih avanga lirthei chuan man (rate) tisang lo turin Minister chuan lirthei neitute a ngen a, "Kum 2021-a petrol leh diesel man Rs 7 laia tihhniam a nih khan lirthei chuan man leh thil phurh man a tlahniam chuang lo a, tunah pawh hian mipui tana thawk an ni tih hre renga tisang lo hrâm turin ka ngen a ni," a ti.

Taxation Minister chuan, Mizoram mipui leh lirtheia eizawngte chu sorkar hmalakna hrethiam tura ngenin, "In tan kan thawk zel dawn a ni," a ti bawk.