Hnam hminga Mizo tih hmang kan awm lo, kan zavaia huap hming a ni - CM Duhoma

Chief minister Lalduhoma chuan September 2, Thawhṭanni khan Rockville, Maryland, USA-ah Mizo Day a hmanpui a; Mizo tih chu Zo hnahthlak zawng zawng huap hming a nih thu a sawi.

CM Lalduhoma hian August 30, 2024 khan Mizoram a chhuahsan a, August 31-ah New York a thleng. September 2 khan Mizo Society of America-in Maryland-a Mizo Day vawi 31-na an hmannaah khuallian a ni. CM hian Washington DC-ah US State Department official-te a hmu dawn a, Indianapolis-ah hun a hmang bawk ang.

Lalduhoma chuan Mizo Day hmangtute chibai bûkin, "Khawvel puma Zo fate'n inunauna leh inpumkhatna nghet zawk kan lo neih theihna tur thinlung pu chungin he Day hi i hmang ang u," a ti a; kum 2010-ah khatih laia chief minister Lal Thanhawla te nupain Mizo Day an lo hmanpui tawh thu te, amah chu Mizo Day 2020-ah khuallian atan sawm ni mah se, Covid-19 avangin kal a remchan tâk loh thute a sawi.

Chief Minister chuan, Lushai/Lusei tih chu hnam hming (generic name) a ni lo a, Mizo hnam pêng zinga pakhat a nih thu a sawi a, "Census hmasa ber 1901-ah khan Mizoramah Mizo inti tu mah an la awm lo a, mahni chi bing hming - Lusei, Hmar, Ralte, Paite, Pawite, Mara, etc ti vekin kan la inziak lut. Kum 1946-ah political party hmasa ber Mizo Union a ding a, Zo hnahthlak pêng hrang hrangte’n kan zavaia kan hnam hming (nomenclature) atan Mizo chu official-a hman a lo ni ta. Mizo inti zingah mahni hnam hminga Mizo tih hming hmang kan awm lo, kan zavaia huap hnam hming a ni tawp mai," a ti.

Lalduhoma chuan, "India, Burma leh Bangladesh-a awm Zo fate zawng zawng hian India hnuaia rorelna pakhat hnuaia awm zai hi kan rel ve thei ang em? Tunlai geo-politics inlumlet mek ngun taka kan bih chuan, hnama min siamtu Khuanu hian hmun khata kan awm ho theihna tur kawng hi min hawnsak dawn em ni aw a tih theih," a ti a; Zo hnahthlak hrang hrangte chu chhûl khat kual an ni tih hre thar leh turin a chah.