Health worker-te thutiam lakna hun hmang

Nimin khan Health Workers' Training Institute, Kulikawnah health worker batch 30-nate thutiam lakna hun, Capping & Lamp Lighting Ceremony hman a ni a, Health minister Lal Thanzara'n a hmanpui.

Health Minister chuan, health worker training chhuakte chu Pathianin missionary ni tura a kohnaah ngai a, missionary rilru púa khawi hmunah pawh hna thawk turin a fuih a; an thutiam, hriselna kawnga mite tana rawngbawltu leh ṭanpuitu nih chu engtik lai pawha hre reng turin a chah.

Health worker-te chu thingtlang pilril, doctor leh nurse-te thlen phak lohna hmunahte a taka thawktu tur an nih thu sawiin, Lal Thanzara chuan, "Health worker zir chhuakte sorkarin hna a pe zung zung thei lo a, mahse a theih ang angin hma lak zel a ni," a ti.

Thutiam lakna hun hi principal medical officer Dr V Lalhmingliani'n a kaihruai a; India rama nurse chawimawina sang ber Florence Nightingale National Award dawngtu C Chawngkimi hnenah lawmpuina hlan a ni.

Tun ṭumah hian health worker zir zo hmeichhe 25 leh mipa 25-in thutiam an la a ni.