Awmpui tihtlem inhuamna lawmawm ti

PRISM chuan thuchhuah siam­in, sum harsatna tihziaawm a nih theih nana minister, speaker leh MLA-te awmpui tihtlem an inhuam thu Finance Minister-in a sawi hi a lawmawm an tih thu an tarlang a, rang taka tihlawhtling ni se an duh thu an sawi.

PRISM chuan, tun dinhmunah Mizoram sorkarin awmpui (household peon) chu Chief Minister hnenah pakua, speaker hnenah paruk, deputy speaker, minister leh parliamentary secretary-te hnenah pali ṭheuh leh, MLA dangte hnenah pahnih ṭheuh a pe niin an tarlang a, "Titlem mai ni loin titawp vek phei se chu kan ramin a ṭhatpui lehzual hle turah kan ngai," an ti.

PRISM chuan, minister leh MLA-te'n hamṭhatna an dawn dang - telephone, kawlphetha, tui, motor, driver leh khawnvartuite pawh ennawn se ṭha an tih thu an sawi a; Mizoram sorkara secretary 154 leh director 241-te leh an awmpuite tana senso leh hamṭhatnate pawh ennawn ṭul an tih thu an sawi bawk.