KHAWTHLIR
Sava zirho
Biodiversity and Nature Conservation Network (BIOCONE), Pachhunga University College-a Zoology Department leh Nature Conservation Foundation (NCF)-te ṭangho chuan March 26 khan PUC-ah 'Bird Monitoring and e-Bird’ tih thupui zirhona an buatsaih.Workshop-ah hian sava thlalak lama tui mi leh sava chanchin zir ṭhin mi ṭhahnem tak an tel a; NCF aṭangin Dr TR Shankar-a'n Mizoram chhunga sava awmze neia zir dan leh chhinchhiah dan a sawifiah. Workshop zawhah field demonstration an nei nghal a ni.
Tourist lodge en
Tourism minister John Rotluangliana chuan nimin khan Hnahlan leh Zothawkthar-a tourist lodge a tlawh a, lodge dinhmun a enfiah. Tourism Minister hi parliamentary secretary (Tourism) TT Zothansanga, KVI Board chairman K Lianzuala leh Tourism department hotute'n an ṭawiawm a ni.
MZU sports
March 23 aṭanga ṭan Mizoram University Sports, 2015 chu nimin khan Ramhlun Sports Complex-ah MZU vice chancellor prof. R Lalthantluanga'n a khar. MZU Sports-ah hian Govt. Aizawl College pakhatna an ni.
Meizu vai
Aizawl District Anti Tobacco Squad chuan nimin khan Bawngkawn, Chaltlang leh Ramhlun North ah puipunna hmuna meizu an awm leh awm loh an vai a, phallohna hmuna meizu mi pariat manin, pawisa an chawitir nghal.
CM Relief Fund
Mamita Zoram Kohhran Hmeichhe Inkhawmpui Lian vawi 46-na Organising Committee chuan Chief Ministers' Relief Fund-ah Rs. 20,000 an chhung lut.
Kawng hawng dawn
Rangvamuala leimin avanga kawng dan ṭhinna chu vawiin chawhnu dar 1:30 aṭang hian lirthei chi tin kal tlang theiha hawn a ni dawn. Thudawn danin, lei a tlak belh tawh loh chuan kawng hi hawn reng a ni tawh ang.