AMC-in Property Tak lakna tur zone ṭhen pawm
Aizawl Municipal Council chuan nimin khan Board of Councillors Meeting an nei a; Property Tax lakna tura Aizawl khawpui zone pariata ṭhen chu an pawm a, khawpui chhung kawng ṭhenkhat hming an phuah bawk.
AMC BoC Meeting hi chairman CT Zakhuma'n a kaihruai a; executive councillor Hmingthanzami'n Property Tax lakna tura Aizawl khawpui zone riata ṭhen a nih dan a sawifiah. Property Tax lakna turin Aizawl khawpuia local council 83 chu uluk taka enfiah a ni a, mithiamte enfiahna ring chung leh LC hrang hrangte nen inberáwnin zone ṭhen a nih thu a sawi.
Mizoram sorkar thuchhuak angin, April, 2015 aṭangin Aizawlah Property Tax lak a ni tawh dawn a; Mizoram sorkara Council of Ministers meeting, March 18, 2015-a neih pawhin Property Tax lakna tura AMC-in Unit Area Method a hman tur leh Annual Property Value aṭanga flat rate 3%-a lak chu a lo remti tawh a ni.
AMC BoC meeting-ah hian Brig. T Sailo sunna hun hman a nih bakah, a chanchinte sawi a ni a; sûn nan ngawi rengin minute khat an ding a ni.
AMC-in kawngpui hming an phuah tharte -
1. Mission Veng to Nursery Veng via Kawltheihuan - Kawltheihuan Khatla East Road
2. PUC gate to Armed Veng South via Bethlehem Vengthlang - Laltheri Road
3. College Veng PUC Road junction to Awithangpa Road via ITI Veng - Suakpuilala Road
4. Republic Veng to Venghnuai - Kela Road
5. Mission Vengthlang to Bungkawn via Khatla South - CP Road
6. Armed Veng Field to Ramthar via Theihai lui bridge - Theihai lui Road