MSU-in MPSC chairman báng turin an ngen

MSU hruaitute chuan nimin khan Aizawl Press Club-ah thuthar thehdarhtute an kâwm a; Mizoram Public Service Commission (MPSC) chairman leh member ruat dan chu India Danpui Article 316 (2) kalh a nih thu sawiin, chairman atana ruat Andrew Lalherliana leh member atana ruat Rev. Zosangliana chu báng turin an ngen.

MSU president PC Lalrinhlua chuan, Andrew Lalherliana chu October 7, 1951-ah a piang niin an sawi a, "MPSC chairman atana ruat a ni hi India Dampui palzûtna a nih avangin he hna bànsan tur hian kan ngen a ni," a ti a, Mizoram sorkar chu MPSC chairman ruatna order sût tura an ngen thu a sawi.

Andrew Lalherliana April 1, 2015 hma ngeia báng tura an phût thu sawiin MSU President chuan, "Kan hun tiam chhunga kan ngenna hi a hlawhtling lo a nih chuan Mizo mipui leh zirlaite aiawhin MPSC a zahawm chhunzawm zel theih nan a ṭul angin hma kan la ang," a ti.

MSU president chuan, Mizoram Synod chhinchhiah danah Andrew Lalherliana chu March 30, 1952-ah thla ruk mi a nih laiin Pastor Thanga'n baptisma a chantir niin a sawi.

PC Lalrinhlua chuan, MPSC dinhmun chu a pawimawh avang­in member tur pawh sorkara tawnhriat nei, service nei ṭha bik leh sorkar hnathawh kawnga mi chungchuang ruat tura sorkar an beisei thu a sawi a, "Rev Zosang­liana hi zah tak chungin, Mizo ṭhalaite leh zirlaite aiawhin MPSC member tura ruatna hi pawm lo turin kan ngen a ni," a ti.

MSU hruaitute chuan MPSC hna lak dan chu rintlak an tih thu sawiin, "Sorkar hna lak hi MPSC kutah a tam thei ang ber awm se kan duh. Politics induhsakna avanga sorkar hnalak a awm

ṭhinte tihbo a nih theihna atan grade pay 4400 chin chunglam hi MPSC kuta dah turin ngenna kan lo siam tawh a ni," an ti a, MPSC kal sualtur venna atan theihtawp chhuah zel an tum thu an puang.