Political party-te'n Brig. T Sailo an sûn

Mizorama political party hrang hrang - MPC, Congress, MNF leh ZNP-te chuan thu­chhuah siamin, Mizoram chief minister hlui Brig. T Sailo chu an ui thu an tarlang a, a kalsan tak a chhungte zawng zawng Pathianin awmpuiin thlamuan se an duh thu an sawi.

MPC ṭhalaite chuan, "Zoram mipuite buaina leh manganna khurpuiah hreawm taka kan rûm laia min hualhima min thlamuantu, Mizoram din chhuahna leh hmasawnna hnukpui, kawlphetha chakna buaipuitu Brig. T Sailo kan chán hi pawi kan tiin kan ui tak zet a, MPC party leh Zoram mipui tan chânna ropui tak a ni," an ti.

Congress party chuan, "Mizoram buai thim chhah vanglai taka Mizo mipui min thlamuantu, PC party president leh chief minister pawh lo ni tawh Brig. T Sailo a boral ta kan sûn tak zet. Mizoram hmasawnna tura a hnathawh zawng zawngte kha amah hriat­reng nan kan hmang dawn a; hruaitu ropui, Mizote min thlamuan ṭhintu kan chán ta hi Mizoram leh mipui­te tan chànna nasa takah kan ngai," an ti.

MNF party chuan, Brig. T Sailo chu Mizo zinga chhuan­awm ber pawl a nih thu sawiin, "MNF-in zalenna a sual laia India sipaite’n Mizo mipuite an nawm an mâka an sawisakna lak ata a lo chhanhim tawh a... Chief minister a nih chhung­in ram tana rotling hna thawk turin hma­chhawp tam tak a nei a; ram hmasawnna tura ngaihtuahna séng mi, mi pamham lo leh sipaia a ṭan lai pawha mi hmingṭha a boral ta mai hi kan sûn tak zet a ni," an ti. Hemi rual hian, Mizoram Governor hlui PR Kyndiah, March 26, 2015-a thi chu an ui thu an tarlang bawk.

ZNP chuan "Mizoram tana a theihna zawng zawng hmang ral raih duh mi, rambuai kan nih laia Mizo mipui min thlamuantu, Mizoram tana hmathlir thui tak nei Brig. T Sailo hi thinlung takin a ui a, kan sûn tak meuh a ni. Mizoram tana a inpekna leh a sûlhnu hnutchhiah chhunzawm tur tam tak hi kan hre reng a ni," an ti.

Mizo Zirlai Pawl pawhin Brig. T Sailo an ui thu sawiin, "Mizoram tana hruaitu ropui, mi rinawm leh mi dik, ram hmangaihtu kan chán ta hi kan ui tak zet a ni," an ti a; mi dik leh rinawm a nih avangin kum 2000-ah MZP-in Mizo politician zinga hlemhletna leh eirûkna laka fihlîm berah an thlang tawh tih an sawi.