Sorkarin ruang phurh man a tum thei tawh

Social Welfare, Tribal Affairs, Women & Child Deve­lopment (SWTAWCD) minister Lalrinpuii chuan nimin khan a pisaah press con­fe­rence a nei a; Mizoram sor­karin mitthi ruang phurhna man a tumsak tur chu September thla tir aṭangin kalpui ṭan a nih thu a puang.

Lalrinpuii chuan, ruang phurhna atan MLA-te an insèn nasat ṭhin thu leh an tan phurrit a tlin thu sawiin, MLA-te insensona hautak tak phuhrûk nan inthlan hmaa an lo intiam tawh angin ruang phurh man chu sorkarin a tum dawn thu a sawi a, "Thil thar a ni a, fimkhur taka tih a ngai a, hmalak zung zung a har. Fimkhur takin ruahmanna kan duang a, Cabinet-in min pawmpui hnuah hman a ni ta a ni," a ti.

SWTAWCD Minister chuan zawhna chhángin, tuna an kalpui ṭan dan chu enchhinna ang a nih thu a sawi a, "Bul ṭanna a ni a, enchhinna a ni. A taka kalpui harsa deuh (practical lo deuh) thilte pawh a la awm thei a, la siam rem zel theih a ni," a ti a; a ṭul dan angin lirthei hman tur bik (em­panel­ment motor) la rua­hman an tum thu a sawi.

Sorkarin ruang phurh man a tumsak tur chu phurh ṭanna leh dahna inkar km. 20 aia tlemah hman theih a nih loh thu sawiin Lalrinpuii chuan, "Km. 20 aiin a hnai tur a ni lo. Ruang phurhna lirthei hman man chu ruang phurh ṭanna hmun leh ruang dahna khaw inkara lirthei hman man ang a ni a, ruang phurhna lirthei chauh a huam a, lirthei dang a huam tel lo," a ti.

SWTAWCD Minister chuan, ruang phurh man sorkarin a peksak chungchanga mawhphurtu department chu Social Welfare & Tribal Affairs department a nih thu sawiin, dilnate chu SWTA directorate leh district-a department office bakah, office an la neih lohnaah chuan district child protection officer-te hnenah pawh thehluh theih a nih thu a sawi.

Zawhna chhangin Minister ṭawiawmtu SWTAWCD hotute chuan, tun dinhmunah chuan sorkarin ruang phurh man a tumsak tur chuan Mizorama ráltlânte huam tel turin an ngaihtuah tel loh thu a sawi a; Mizo pawh ni se, Aadhaar card / voter identity card nei lote tan tunah chuan hman ve theih a nih loh thu an sawi bawk.

RUANG PHURH CHUNGCHANGA INKAIHHRUAINA

☑ Ruang phurhna lirthei hman man chu ruang phurh ṭanna hmun leh ruang dahna khaw inkara lirthei hman man ang a ni a, ruang phurh tanna leh a dahna hmun inkar km. 20 aiin a hnai tur a ni lo.

☑ Ruang phurhna man hmuh let theih chu lirthei pakhatah chauh a ni a; ruang phurhna lirthei hman man chauh a huam.

☑ Ruang phurhna hman man sorkara diltute'n thla khat chhungin dilna, application form siam sa angin Social Welfare &Tibal Affairs Director emaw, an district-a Social Welfare department hotute hnenah emaw thehluh tur a ni.

☑ Department website socialwelfare.mizoram.gov.in ah application form lak (download) theih a ni a, office lamah lak theih a ni bawk.

☑ Ruang phurh man (rate) chu State Transport Authority rate hman lai ang zel a ni ang a; lirthei man to chi - cheng nuai 17 aia to hman theih a ni lo.

☑ Ruang phurhna hlat zawng chhût nan ruang chhuahna aṭanga dahna khaw inkar hlat zawng lak tur a ni a; lirthei thlen lohna khua a nih chuan lirthei thlen theih tawpna thleng a ni ang.

☑ Dilnaah thi a nih chuan death certificate emaw, thihna hmun damdawi-ina doctor-in a thi a ni tih a ziahna (declaration of death), damdawi-ina thi a nih loh chuan VC/LC emaw, YMA/MTP/YLA/YCA hriatpuina lehkha, mitthi Aadhaar/voter ID photocopy (kum tling lo tan nu leh pa document), lirthei hmanna receipt original-te telh a ngai.