
Kumin fûrah Mizorama kawngpuiah leimin lian 570 a awm - PWD Minister
PWD minister Vanlalhlana chuan, Mizorama kawng chhiate chu ruahsur hun lai a nih avangin an duh anga an siam theih loh thu leh kumin fûrah Mizorama kawngpuiah leimin lian zual (major slide) 570 a awm tawh thu a sawi.
Mizoram Government Drivers' Association (MGDA)-in an diamond jubilee nimina Synod Conference Centre-ah an lawm a hmanpuinaah PWD Minister chuan, kuminah kum dang aiin ruah a sûr nasat thu leh leimin a tam thu a sawi a, "Kawngpuiah leimin lian zual (major slide) 570 a awm tawh a, a tê neuh neuh phei chu sang chuang a awm," a ti.
Vanlalhlana chuan, "Mipui an phun kan hlauh avangin ruahsur loh laiin kawng kan siam a, ruah a rawn sûr a, a hawrh chhe leh vek zel. Mipui pawhin min hrethiam niin kan hria a, driver-te pawhin min hriatthiam ka beisei. Khuate han ṭha se, kawng kan nei ṭha ang tih ka ring," a ti a; tunah chuan an duh angin PWD-in kawng an la siam theih loh thu a sawi.
Mizoramah sq.km. 100-ah kawngpui km. 46 vel road density a awm thu leh India ram pum ngaihtuahin road density a chhiat thu sawiin Minister chuan, "Mizoram hi tlang ram a ni a, duhthusamin kawng kan nei ṭha thei tak tak dawn lo a, kan neih chhunte kan dim thiam a ngai. Kawng a chhiat hian sorkar kan mawhpuh ṭhin a, a dik a, amaherawhchu, kawng zawng zawng hi Mizoram sorkar siam leh mawhphurhna vek a ni lo. Phai lam company-te siam leh enkawl tam tak a awm a, an hnathawhah ṭha lo tam tak a awm," a ti.
Mizoramah sq.km. 100-ah kawngpui km. 46 vel road density a awm thu leh India ram pum ngaihtuahin road density a chhiat thu sawiin Minister chuan, "Mizoram hi tlang ram a ni a, duhthusamin kawng kan nei ṭha thei tak tak dawn lo a, kan neih chhunte kan dim thiam a ngai. Kawng a chhiat hian sorkar kan mawhpuh ṭhin a, a dik a, amaherawhchu, kawng zawng zawng hi Mizoram sorkar siam leh mawhphurhna vek a ni lo. Phai lam company-te siam leh enkawl tam tak a awm a, an hnathawhah ṭha lo tam tak a awm," a ti.
PWD Minister chuan, Aizawl khawpuia kawngpuite chu Mizoram sorkar mawhphurhna a nih thu sawiin, "Kuminah kum dang aiin ruahtui a tam a, Mizo history-a 'minpui kum' an sawi ai khan kumin hian leimin a tam ka ring. Aizawla kan kawngte a chhe chho hle a, sorkarin theihtawpin ṭan a la a ni," a ti a; lirthei khaltute chu tunlai mila an thiamnate tipung zel tur leh hriselna ngai pawimawh turin a chah.
MGDA diamond jubilee lawmna hi an vice president Lalnunzira Colney-in a kaihruai a, president Lalrinngheta'n thu a sawi. Minister Vanlalhlana'n jubilee lawmpui nan Rs 10,000 a pe a ni.
MGDA hi September 4, 1964-ah din a ni a, Aizawlah general headquarter awmin, district hrang hrangah sub-headquarters 10 an awm. Member 1,000 vel an awm mek a ni.