Dental surgeon lem hmangtu jail-ah dah a ni

National Health Mission (NHM) hnuaia medical document lem hmanga dental surgeon hna thawk Christina Lalṭhazuali, Dinthar, Aizawl chu jail-ah a awm a; a thubuai hi police-in an chhui zui mek zel.

Police aṭanga Vanglaini thu dawn danin, Christina Lalṭhazuali hi Aizawl District Court leh Gauhati High Court, Aizawl Bench-in bail a dilna an hnâwl hnuah police-in an man a, thu an zawhfiah hnuah jail-ah dah luh a ni. Jail-ah a la awm leh awm loh an hriat loh thu sawiin police hotute chuan, "Keini chuan jail-ah dah turin thutlukna kan siam. Jail-a a luh hnuah bail-in a chhuah leh chhuah loh kan hre mai lo," an ti.

He thubuai kaih-hnawihah hian police-te chuan Manipur-a cheng hmeichhe pakhat chu an ko a, "Tun thlengin a la rawn inlan lo," an ti a; an nghak leh deuh ang a, a inlan lo a nih chuan anmahni huamtu police station-ah man tura an ngen tur thu an sawi.

Police-te chuan chhui zui ngai a tam thu sawiin, "Kan la chhui mek zel a, buaipui ngai a awm nual. Chargesheet kan la peih hnai dawn lo deuh," an ti.

Christina Lalṭhazuali hi February 2023 khan NHM hnuaia thawk turin mi dangte rualin lak a ni a, document lem a hmang tih hriat a nih hnuah June 5, 2024 khan bànna a thehlut. A lakah Health department-in FIR an thehlut a, Aizawl Police Station-ah thubuai ziah luh a ni.