Badge dum bel dawn lo

Thla thum chhung hlawh an lâk tawh loh avanga vawiina Teachers Day-a badge dum bel tum Samagra Shiksha hnuaia thawktute chuan badge dum an bel dawn lo.

Federation of Mizoram Samagra Shiksha Em-ployees (FEMSE) chuan, Education Minister leh Adviser to Chief Minister (Finance)-te'n badge dum bel lo tura an ngen avang te, sorkarin thla thum hlawh siamsak mek an nih thu an hrilh avangte leh, sorkar laipui aṭanga sum lo thleng mai tur hriattir an nih avangtein sorkar hotute ngenna zawm phawt ṭha an tih thu an tarlang.

FEMSE chuan, badge dum bel rih loh an tih tâk rualin, sorkarin an thil phûtte a tihhlawhtlin loh chuan na zawka sorkar nawr an rel thu an tarlang bawk.

FEMSE THUCHHUAK

■ September 4, 2024 aṭanga chhiarin kar khat chhungin thla 3 hlawh min pe tura sorkar hnenah thlen ni se. Min pe thei lo a nih chuan FEMSE Council-in na zawka kan kal dan tur a rel leh ang.

■ Tun hnuah hlawh mumal taka kan lak theihna turin central aṭanga state Finance-a sum a lo thlen veleh Samagra Financial Norms angin ni 15 hma ngeiin SNA account-ah state matching share nen sorkarin Samagra sum chhung lut ziah tura thlen ni rawh se.