Spoil bank-ah chauh leivûng paih turin CYMA hruaitute'n NHIDCL hotu an chah

Central YMA hruaitute chu nimin tlai khan national highway enkawltu, National Highways and Infrastructure Development Corporation Limited (NHIDCL) pisaah an léng a; executive director Virender Kumar Jakhar chu Mizorama NHIDCL hnuaia kawng laih leh siam meka harsatnate sawipuiin, spoil bank-ah chauh leivûng paih an duh thu an hrilh.

CYMA hruaitute hian an hnena YMA sub-headquarters hrang hrangin an huam chhunga NHIDCL hnuaia kawng siam meka harsatna awm an thlente Virender Kumar Jakhar chu an hrilh a; Virender Jakhar chuan kawngpui siam mek dinhmunte a lo hrilhfiah.

CYMA hruaitute'n an sawipuite chu: Aizawl-Tuipang NH-54 kawnga Khumtung-Serchhip inkara kawng siam ṭha lo leh side drain siam ṭha lo te, Lunglei-Tlabung NH-302 kawng siam mek chak zawka thawh an duh thu te, Saitual-Saichal (NH-102B diversion) inkara leivûng paih fimkhur loh avanga harsatna awm leh leivûng paihna tur (spoil bank)-ah chauh leivûng paih an phût thu te, Kawnpui-Kolasib kawng chungchangte a ni.

NHIDCL Executive Director chuan, spoil bank ni loa leivûng paih chungchangah hmalak zui a tum thu te, Lunglei-Tlabung kawng chu December 2024-ah zawh deuh vek a nih tur thute a sawi a; Saitual-Saichal inkar kawng leh hmun danga an hnathawh dinhmunte a sawifiah bawk.

CYMA hruaitute chuan, Mizoramah kawngpui ṭha a awm theih nan leh kawng siam hna kal mek chu tluang taka a kal theih nan contractor-te puih an inhuam thu an sawi a; dan ang thlapa hnathawh a nih theihna tur te, ṭha tak leh tlo ngei tura hna thawk tur te, spoil bank-ah chauh leivûng paih an duh thute NHIDCL hotu an hrilh a ni.

Inkawmnaah hian CYMA president Lalhmachhuana, general secretary Prof. Malsawmliana, assistant secretary Fabian Lalfakawma leh finance secretary MS Ralte te an tel.