Hnahthial district-ah Myanmar raltlan zirlai 215 an awm mek

Hnahthial District Task Group on Myanmar Refugees chu an chairman Rita Lalnunmawii Pachuau, district bawrhsap kaihhruaiin nimin khan an ṭhukhawm a, raltlante dinhmun leh raltlan enkawlnaa harsatnate an sawiho. Hnahthial district-a sikul hrang hrangah Myanmar raltlan zirlai 215 an awm mek thu tarlan a ni.

Hnahthial District Education Officer tarlan danin, kum 2024-25 academic session-ah sikul hrang hrangah Myanmar raltlan zirlai 215 an awm a, sikul uniform leh zirlaibu lei kêp ṭhin an ni. Raltlan zirlaite chu primary school-ah hmeichhia leh mipa 52 ve ve, middle school-ah mipa 42 leh hmeichhia 39, high school leh higher seconday school-ah mipa pariat leh hmeichhia 22 an ni.

Thingsai, Ngharchhip, New Ngharchhip, Tarpho, Khawhri, Hnahthial North-I, North-II, South-I, South-II leh South-III VC president-te chuan an huam chhung ṭheuha raltlan dinhmun an tarlang a; raltlan zingah buaina siam leh khawtlang tana hnawksak an awm rih loh thu an sawi.

DC Rita Lalnunmawii Pachuau chuan, Myanmar raltlante chu Zo hnahthlak an nih anga ṭha taka dawnsawn a ṭul thu sawiin, "Ramriin min daidang mah se, kan lo dawnsawn dan aṭangin kan inunauna a la nghet reng a ni tih a lang," a ti a; VC leh tlawmngai pawl hrang hrangte'n raltlante ṭha taka an lo enkawl ṭhin chu lawmawm a tih thu a sawi.

Raltlante chu Zo hnahthlak ni mah se, an duh ang anga an pêm kual loh nan DC chuan khauh taka kal tur leh YMA pem lehkha an lak ngei theih nan hma la turin kalkhawmte a chah a, "Raltlante hi kan khawtlang dinhmun tihbuaitir kan phal tur a ni lo. A ṭul a nih chuan khauh zawka kan enkawl pawh ngai," a ti.

Hnahthial additional SP Beimosia Lapi tarlan danin, thubuai chhinchhiahna (crime record) aṭang chuan Hnahthial district-ah hian raltlante vanga buaina a la awm lo a; Thingsai leh New Ngharchhip-te chu ruihhlo luhka a nih theih avangin fimkhur ṭul an ti thung.

Chief Medical Officer chuan, raltlante hnenah an kum mila dawn tur damdawi hrang hrang an pek ṭhin thu te, raltlan zingah nau pai an tam thute a sawi. PHE department hotute chuan, pipeline lama harsatna an neih dante an sawi a; Power & Electricity hotute'n raltlan chhungkaw hrang hrang hnena kawlphetha an pek dante an tarlang.

Child Development Project Officer chuan raltlante chu Aadhaar card an neih ve loh avangin Poshan tracker-ah thun theih an nih loh thu leh, raltlan tan sanction a awm loh avangin raltlan naupang kum ruk hnuai lam chu nutrition-ah an kêp ṭhin thu a sawi.

Election officer Esther Leihang pawhin VCP-te chu electoral roll ennawn (revision) hunah fimkhur leh dik taka India khua leh tui chauh thun turin a chah a, "Raltlante hi kan unaute an nih rualin, India khua leh tui an nih ve loh avangin electoral roll-ah an tel ve thei lo a ni," a ti.