Congress ṭhalaite'n tuialhthei man tihpunna notification copy an hâl

Mizoram sorkarin tuialhtheia chhiah (value added tax) a tihpun leh chhiah (cess) thar a lak chu duh loin Mizoram Pradesh Youth Congress Committee (MPYCC) chuan nimin khan Treasury Square-a MIZOFED filling station bulah chhiah tihpunna notification copy an hâl.

Sorkar notification copy hâlnaah hian MPCC treasurer Dr Lalmalsawma Nghaka chuan, Zo fate Jerusalem - Mizoramah Mizote chu chhiah hmangin beih leh rûn mek an niin a sawi a, "Mi harsa zawkte tan zalenna, danglamna, kalphung thar min tiamtute'n Mizoram mipuite chhiah uchuak tak hmangin min salbeh an tum mek. Property registration fee uchuk lutukin an tisang tawh a, tunah uchuak mangkhengin petrol leh diesel chhiah an ti sang leh a ni," a ti.

Dr Lalmalsawma chuan, Mizoram mipui an rûm mek laiin Chief Minister chu mipui auh phak lohin a zin daih nia sawiin, a lo haw hunah tuialhtheia chhiah tihpun chu ngaihtuah nawnin, sût leh se an duh thu a sawi.

MPYCC chuan thuchhuah siamin, tuialhtheia chhiah tihpun leh chhiah thar lak chu lirthei neitu mai ni lo, mi harsa tê têm lirthei nei lote pawhin an tuar dawn niin an sawi a, "Sumo, taxi, bus chuan man thlengin a nghawng dawn. Board chairman leh adviser to CM tam tak te, political appointment-a phuahchawpa nihna inpek leh hlawh uchuak taka tipung vak vak loin, miretheite tawrhna chhiah tihsan vak vakte hi a ngai lo ang," an ti.

Congress ṭhalaite chuan, ZPM hoturte chu chhiah tisang lo turin an intiam nia sawiin, "Chhiah tisang lo tura intiamte’n heti zata an tisang hi mipui hmuhsitna leh bumna liau liauah kan ngai," an ti a; ZPM sorkar chu Mizoram tan mangchhiaa an ngaih thu an tarlang bawk.