MSCW Chairperson chungchang SWTAWCD Minister-in a sawifiah

Social Welfare, Tribal Affairs, Women & Child Development (SWTAWCD) minister Lalrinpuii chuan, Mizoram State Commis-sion for Women (MSCW) chairperson C Lalchhan­dami chu sorkarin a pian kum a neih ang chuan kum 65 a la tling lo a, tuna a hna chu a la thawh theih thu a sawi.

Minister Lalrinpuii hian nimina a pisaa thuthar thehdarhtute a kawmnaah zawh­na chhangin, C Lalchhan­dami'n MSCW chair­person a nihna turin document hrang hrang a thehlut tih a sawi a, "Mizoram sorkarin chairperson atana ruat a tum lai khan a biodata leh document rawn submit tura hriattir a ni. Birth certificate a rawn thehluhah chuan kum 1960-a piang a nih avang­in department lam chuan appoint theih loh a nihna kan hre lo," a ti.

Lalrinpuii chuan, C Lalchhandami kum chungchanga sawi awm chu an zir chian mek thu a sawi a; C Lalchhandami chu a thawk ṭha hle nia sawiin, "A awm chhung rei lo têah hian MSCW hian case 102 zet an ngaihtuah hman a, chu'ng zinga 80% vel chu an chingfel tawh," a ti.

Member pasarih ruat thar chungchangah Minister chuan, Com-mission-in case a khawihte chu district hrang hranga mite a nih avangin district lam represent-tu awm ve se an duh a, district danga mite pawh ruat ve an nih tâk thu a sawi.

MSCW member ruat tharah member ni laite ruat thuah nia sawi chungchangah SWTAWCD official-te chuan, "Sorkar order hmasaa member ruat danah MSCW Act emaw, MSCW Rules emaw hnuaia appoint an ni lem lo. Appoint tih pawh a ni lo a, nominate tih an ni nghe nghe. Dan tlawhchhana ruat an nih loh avangin dan hmanga bân hmasak kher ṭul loa ngaih a ni. A hun chhung sawi chian a ni lo a, 'until further order' tih a ni a, order hmasa chu order tharin a thlak ta a ni," an ti.

SWTAWCD Minister tarlan danin, MSCW hi The Mizoram State Commission for Women Act, 2004 leh The Mizoram State Commission for Women Rules, 2008 hnuaiah din a ni a, chairperson bakah member pasarih - hmeichhia hlir ruat tur a ni. Member secretary atan sorkar hnathawk group A officer, Social Welfare department-a mi dah tur a ni bawk.

MSCW hi hmeichhiate humhim an nih theihna tur te, an dikna leh chanvo humhalhna atan kawng hrang hranga hma la turtein din a ni a; chair-person leh member atan hmeichhe humhimna leh hmasawnna lam tuichilh mi leh thawk peih, hriatna leh finna lama tawnhriat nei ṭha an nih a ṭul.

SWTAWCD MINISTER SAWI DANGTE

¤ Central lam tih dan zûlzuiin MSCW chairperson leh member-te term khatah kum 3 emaw, kum 65 an nih thleng emaw ruat theih an ni a, kum 65 an pêl tur a ni lo.

¤ State dangte tih dan kan zir chiang mek a, West Bengal chuan kum 70 thleng (upper age limit) an bithliah a, Goa chuan upper age limit bithliah loin, a hnuai lamah chauh kum bithliah (lower age limit) siamin, kum 40 aia naupang lo tiin an dah.

¤ Hengte avang hian kan dan hman hi zir chiana enṭhat leh tum mek a ni.