Samagra zirtirtute'n hlawh an lâk loh chhan sorkarin a tih tur a tih loh vang - MNF

MNF party chuan thuchhuah siamin, Samagra Shiksha hnuaia zirtirtute'n hlawh an lak loh chhan chu sorkarin thla 5 chhung a tih tur a tih loh vang niin an tarlang.

Samagra Shiksha-a zirtirtute'n thla thum chhung hlawh an la thei lo chu pawi an tih thu sawiin MNF chuan, "Hei chen an thawh hlawh an la thei lo leh Teachers Day hial boycott an tum hi a lungchhiatthlak kan ti hle. Hetiang harsatna a lo thlen chhan hi Mizoram sorkarin a tih tur a tih loh vang a ni tih hi kan puang," an ti.

MNF party chuan, Education Minister-in Samagra-a thawkte hlawh lak theih loh chhan chu thla 5 chhung sorkar laipuiin Mizoram sum dawn tur a pek loh vang tih a sawi chu a dik tih sawiin, "Thla 5 chhung Central-in kan sum dawn tur min pek loh chhan hi Mizoram sorkarin a tih ve tur thla 5 chhung a tih loh vang a ni. Mizoram sorkarin Teachers Education Allocation leh thil dang ṭul tih tur ang a tihfel har avangin zirtirtute hian hlawh la thei lo a ni," an ti a; sorkar inthlahdah vang leh dap chawp lutuka an kal vang niin an tarlang.

Samagra Shiksha-a thawkte'n hlawh an lak theih loh chungchangah Education Minister chu mawhpuh tur zawng lo a, a inthlahdah vang leh a hna a tlin loh vang a ni tih pawm turin MNF chuan an chah a, "Rang taka Samagra zirtirtute'n hlawh an lak theih nan hma la nghal rawh se," an ti.