Chief Minister leh RRRa inhnialna thai bo turin Speaker kan ngen - AAP

Aam Aadmi party (AAP), Mizoram hruaitute chuan, tun hnaia Assembly session neih zawh tak chungchanga an ngaimawhte Assembly Speaker hnenah an thlen a; chief minister Lalduhoma leh MNF member Robert Romawia Royte te inhnialna thu chu House Proceedings aṭanga thai bo turin an ngen tih an sawi.

AAP hruaitute hian nimin khan Aizawl Press Club-ah thuthar thehdarhtute an kâwm a; an convener Andrew Lalremkima chuan, MLA Robert Romawia Royte-in kohhrana thawhlawm a thawh zat chungchang House Leader-in a sawi chhuak chu ṭha lo an tih thu sawiin, "Kan ram rorelna sang bera mimal thil lutuka ṭawngkama inbeihna a awm leh ṭhin hi thleng nawn tawh lo se kan ti hle. Chuvangin, House Leader leh Pu Robert Romawia te thusawi kha House Proceedings aṭanga thai bo (expunge) turin kan ngen a ni," a ti.

Andrew Lalremkima chuan, Assembly chu mipui aiawha thlante'n ram pum mipuite aiawh leh ram tana ro an relna hmun sang ber a nih avangin thu dik zîktluak lo leh finfiah tlak loh House-ah sawi tawh lo turin Chief Minister, minister leh MLA zawng zawng an ngen tih a sawi.

AAP hruaitute chuan, Chief Minister chuan kuhva chîn khap a nih thu House-a a sawi chu chiang zawkin sawi thei se an duh thu an sawi bawk.