School Education leh NEDFi ten MoU ziak

School Education department leh North Eastern Education Development Finance Corperation Ltd. (NEDFi) te chuan nimin khan School Education directorate conference hall-ah thawh dunna thuthlung, memorandum of understanding (MoU) an ziak.

Thuthlung hi Mizorama higher secondary school chin zirlaite'n an zir zel dan tura kaihhruaina an dawn theihna atan 'Advancing North East Initiative for Career Mentoring of Students' tih hnuaia ziah a ni. Kum khat chhung atan ziah a ni a, Mizoram sorkar aiawhin School Education director Lalsangliana leh NEDFi aiawhin executive director SK Baruah ten hming a ziak a ni.

MoU ziahna hun hmanpuitu Education minister Dr Vanlalthlana chuan, School Education department leh NEDFi-te thawh dunna chu Mizoram zirna atana rahbi pawimawh tak a nih thu a sawi a, "Mizorama zirlaite tan hma hun êng zawk leh ṭhalaite tan beiseina thar a thlen ka ring," a ti a; MoU a hlawh­tlin lehzual theih nan theihtawp chhuah turin official-te a chah.

MoU kaltlang hian Mizorama HSS chin zirlaite chu an zir zel dan tur chungchangah kaih­hruai an ni dawn a, sikul tin aṭangin zirtirtu ruat bikte kaltlangin zirlaite kaihhruai tum a ni.