KHAWTHLIR

Assam Rifles insawn chungchang sawiho

Secretary to Chief Minister Vanlaldina Fanai hoin nimin khan Mizoram sorkara Home department leh Land Revenue & Settlement department aiawhte leh Assam Rifles hotute'n Assam Rifles Office's Mess-ah Aizawl khawpui laili aṭanga Zokhawsanga AR insawn chhuah chungchang an sawiho a; a ram awm dante an enho nghal bawk. Ṭhutkhawm hi Chief Minister leh AR director general Lt.Gen. Vikas Lakhera te August 26, 2024-a an inkawmna bawhzuina a ni.

Thisen pe

Women's Polytechnic, Aizawl NSS leh Red Ribbon Club chuan nimin khan Synod Hospital tan thisen unit 20 an pe a, petute hmeichhia 19 leh mipa pakhat an ni.

Kawng siam tur en

Adviser to chief minister TBC Lalvenchhunga, Aizawl West-I bialtu MLA chuan nimin khan a bial chhunga Sihhmui-Ramrikawn kawngpui thlûr hniha siamna tur a en a, PWD leh a kaihhnawih department dang officer-te'n an ṭawiawm. MLA chuan, Ramrikawn kawng péngṭhuam chu kawng lûn leh pawimawh a nih avangin a rang thei anga siamṭhat vat a ngaih thu a sawi. MLA hian Luangmual thlamual hluia transformer chhia a tlawh bawk.

Bazar sak endik

Lunglei Municipal Council vice chairman K Lalrinawma leh councillor Zonunmawii te chuan nimin khan Lunglei Super Market sak mek an enfiah. K Lalrinawma chuan, hna thawktute chu an hna a ṭhat rualin an muang tih a hrilh a, chak taka thawk turin a chah. Lunglei Super Market hi April 25, 2023-ah sak ṭan a ni a, August 2025-a sak zawk tura tih a ni. LMC hotute'n an enfiahnaah hian PWD executive engineer Zodinga, contractor leh Southern Super Market Association hruaitute an tel.

Sangha no sem

Fisheries department chuan nimin khan Saitual district-a Khawkawn, Chiahpui, NE Khawdungsei leh Ngopa khuaa sangha khawitute hnenah sangha no an sem. PMMSY hnuaia ṭanpuina mi 25 hnenah an pe a, sangha dil sawngbawl leh enkawl dan an zirtir bawk.