HPC(D) kuta thi police pathumte Ropui takin thlah liam an ni

Mizoram hmar lam tlangdunga zin, Assembly Assurance Committee member pathumte chu Inrinni zing dar 8:56 khan HPC(D) mite'n Zokhawthiang dáiah an lo lambun a, police pathum an kah hlum bakah, mi dang paruk an kâp hliam. Police thite hi nimin zing khan Mizoram sorkarin thlahna hun a hman hnuah nimin khan an khua/veng ṭheuhah vui an ni.

Helhoin an lambunte zinga mi, government deputy chief whip RL Pianmawia, MLA sawi danin, Assembly Assurance Committee member pathum - RL Pianmawia, Lalthanliana leh Vanlalawmpuii Chawngthu-te hi Tuivawl bial chhunga khaw panga tlawh tura kal an ni a; March 27, Zirtawpni-ah khaw pathum an tlawh a, March 28-ah khaw pahnih tlawh leh tur an ni.

Zokhawthiang tlawh turin Sakawrdai aṭangin Inrinni zing dar 6-ah an chhuak a, motor pasarih an inzui. Zokhawthiang an thleng ṭep tawh tihin, zing dar 8:56-ah HPC(D) mite chuan lambunin, hma lam, hnung lam leh a sír lam aṭangin an kâp niin RL Pianmawia chuan a sawi.

A hma bera tlan (pilot) motor-a chuang Sakawrdai Police Station-a OC sub-inspector Zoramthara Khawlhring, Khawzawl; motor khalhtu driver, Naik C Lalchuailova, Bawngkawn leh 1st. MAP constable Hmangaihmawia, Dinthar, Aizawl-te chu an kâp hlum nghal a ni.

Sakawrdai SDPO Zar­­zoliana, havildar Vanṭhuama, con­stable Lal­hmangaiha, constable Lal­khawngaiha, RL Pianmawia motor khalhtu Lal­chhuanawma leh, Assembly Secretariat staff Zohmingthanga te an kâp hliam bawk. Hliamte hi Inrinni chawhnu dar 3 vel khan helicopter hmangin Aizawl phurh thlen an ni.

Hun eng emaw chen helhoin an kah hnuah Committee chairman RL Pianmawia chuan bán a pharin a au chhuak a; HPC(D) pawhin silai hmehpuah an titawp a, police-te silai kawlte an chhuhsak hnuah, chawhma dar 10:45-ah an kal kiansan ta a ni.

RL Pianmawia chuan, "Kan PSO ten silai mu an nei tawh si loa, kan mang vek ai chuan tiin bán phar mai kan titlu ta a ni," a ti a, a ban phar tur chungchangah hian SDPO a rawn a, SDPO chuan ban phar chu duh lo mah se, duhtlan tur dang a awm loh avangin ban a phar tak tho thu a sawi.

RL Pianmawia chuan, HPC(D) hian grenade vawi hnih an vawm a, mahse a puak lo ve ve a, kawng chhak lam aṭangin thing tum an lum khum bawk a, mahse a tung zawnga a tlak avangin an him niin a sawi a; motor-te chu an kap chhe hlawm viau niin a sawi bawk.

Hel ho kal kian hnuah Zokhaw­thiang mite'n MLA-te leh anmahni ṭawiawmtute chu an buaipui a, Ṭinghmunah an lêt a, Ṭinhmun YMA-in mitthite kuang tur an siamsak. Ṭinhmun aṭangin Sakawrdai an pan leh a, hliamte chu Sakawrdai aṭangin helicopter-in Aizawl panpui an ni a; mitthite chu Sakawrdai damdawi-inah doctor-te'n an endik.

Police thite ruang hi Inrinni khaw thim hnuah Sakawrdai aṭangin Aizawl panpui a ni a, khaw hrang hrangah mipuite'n an lo hmuak. Zanlai pelh hnu, nimin zing lam dar 2:15 velah Ṭhuampui an thleng a, AMC Office tualah Central YMA huaihawtin Aizawl khawpuia YMA branch hrang hrang member ṭhahnem takin an lo hmuak a, an pualin hun hman a ni.

Nimin zing khan Mizoram sorkar chuan hel kuta police thite sunna leh thlahna inkhawm, 1st. MAP hmunah an hmang a; chief minister Lal Thanhawla, minister-te leh parliamentary secretary, MLA, chief secretary bakah Mizoram DGP leh police hotute'n an kuangah pangpar an dah.

1st. MAP hmuna hun hman zawhah ruangte chu an khua/veng ṭheuh panpui an ni a; nimin chawhnu khan vui an ni.

RL Pianmawia chuan, a bial chhunga thil thleng chu zahthlak a tih thu sawiin, "Bialtu ka nihna angin ka zak a, ka rilru a ná a, hrehawm ka ti hle a ni... Sorkarin duat taka kan bial mamawhte min ngaihtuahsak laia hetiang thil a thleng hi, ka bial mamawh pawh ka sawi chhuak leh ngam ang em ka ti hial a ni," a ti. Hemi rualin, Mizo mipuite tawrhpuina leh ṭawngṭaipuinaah lawmthu a sawi a ni.

MLA pathumte lo lambuntu HPC(D) te zingah hian Mizoram police, Sakawrdai post-a a awm laia police rifle pahnih nena kum 2014-a tlanbo ta Malsawmkima pawh a tel.