Min chona hi kan pawm: CM Hawla Thisen a thlawnin a luang ral lo ang: HM Zira

Chief minister Lal Than­hawl­a chuan, hel hoin Mizoram MLA pathumte lambuna Mizoram police pathum an kap hlum chu Mizoram sorkar chona niin a sawi a, "Min chona hi kan pawm," a ti. Home minister R Lalzirliana pawhin martarte thisen chu a thlawna a luan dawn loh thu a sawi.

Nimin zinga 1st MAP hmuna HPC(D) helte'n March 28-a police pathum an kah hlumte sûnna hunah thu sawiin, Chief Minister chuan, HPC(D)-te thil tih chu sorkarin a ngawih bopui mai mai dawn lo tih a sawi a, "Heng thil rapthlak tak titute hian inbiak an duh thu an sawi ṭhin. Kan unaute dan hnuaia an lo awm theihna atan sokar pawh a inbuatsaih. Mahse Assembly Session-a 'Zofate inpumkhatna dâltu chu engmah tih ni lo rawh se' tih pass a nih laia hetiang thil tenawm tak titute hi hnam inpumkhatna tur dâltute an ni," a ti.

HPC(D)-te chona chu pawm a nih loh chuan Mizo mipuite an zuam telh telh dawn tih sawiin Lal Thanhawla chuan, "He ram mipui­te hi min cho hle a, min chona hi kan pawm a ni tih ka hriat­tir a ni," a ti a; HPC(D)-te chu sorkarin a ṭul dan leh a thiam dan dana a chhan lêt tur thu a sawi.

CM Lal Thanhawla chuan, Mizo­rama cheng Zofate chu nuai 10 âwrh an nih avangin Zo hnah­thlak hmun hrang hranga awmte insuihkhawm a, hnam lian leh ropuia insiam an duh thu sawiin, "Hetih laia inpumkhatna dodal zawnga an che hi an demawm tak zet a, thlauhthlak chi an ni lo," a ti.

Chief Minister chuan, mitthi chhungte chu thlamuang taka awm turin a chah a, hliamte pawh ṭha taka dam chhuak thuai turin duhsakna a hlan. Police thite chu sorkarin Rs. 7,00,000-a a râl dawn bakah, an chhungte police-ah lak an nih tur thu leh, hliamte enkawlna senso zawng zawng sorkarin a tumsak tur thu a sawi bawk.

Home Minister R Lalzirliana chuan ram hmasawnna atana feh chhuakte beih an ni chu a dem tih sawiin, "Hmun kilkhâwra awmte'n hma an sawn theihna atana hmasawnna intluktlang taka a awm theihna tura beitu vengtute thah an ni hi a pawi hle. Hna thawk peih lo, mi thatchhia­te kutah khawi bial mah a awm lo ang," a ti.

HPC(D)-te bei let turin sor­-kar­in a ṭul ang ang a ti dawn tih sawiin Home Minister chuan, "Ram tana nun hlantute thisen hi a thlawnin a luang ral lo ang.

Police-te u, ram leh hnam in­pumkhatna atan theihtawp chhuah zel ang che u," a ti a; police-te chu an hnungah Mizo ṭhalai rual an awm thu a hrilh a ni.