Sikulah ruahmanna zâwm lote hrem dawn

School Education department hotute chuan March 28, 2015 khan Aizawl Press Club-ah thuthar thehdarhtute an kâwm a; academic session thar 2015-16 atan sikul kai hun leh bàn hun, sikul luh ṭan hun, school fee leh syllabus an duante an sawi a, "A zâwm lo sikulte chu an school recognition suspend sak emaw, withdraw sak emaw thleng pawhin ngaihtuah a ni ang," an ti. April 1 aṭangin sikul luh ṭan tur a ni.

School Education director K Lalthawmmawia chuan, zirna kawnga Mizo­ramin hma a sawn theihna atan leh khawtlang tan pawha a ṭhat zawk beiseiin sikul kai hun sawn hma a ni tih sawiin, "Rawtna leh ngaihtuahna pawh committee hrang hrangah vawiduailo sawiho a ni a, mipuiah ṭha zawk tura beiseina leh duh lo au aw pawh a inkalh nuaih fo ṭhin," a ti a; state dang ngaihdan leh kalphung­te pawh zir chian a nih hnuah Cabinet meeting-in sikul kai hun tih hma a pass tâk thu a sawi.

K Lalthawmmawia chuan, sikul luh ṭan hun April 1 chu sikul zawng zawngin an zâwm tur a nih thu sawiin, "An zawm leh zawm loh hre chiang turin anmahni bialtu DEO, SDEO, DPC (SSA), BRCC (SSA) leh CRCC (SSA)-te ṭheuh chîk taka vil tur leh April 2015 chhunga director hnenah report thehlut tura hriattir an ni. Sikul ṭan nía ruata ṭan lo hriatte chung­ah a ṭul angin sorkar­in hma a la ang," a ti.

Kum 2015-16 academic session atan sor­karin school syllabus leh text book a siam tih sawiin K Lalthawmmawia chuan, syllabus leh text book thar hi sorkar leh private school-te'n an hmang tur a nih thu a sawi.

School Education director sawi danin, private sikulte chuan monthly fee atan KG - Class VIII inkar­ah Rs. 1,000 aia tam lo an la tur a ni a, Class IX leh X-ah Rs. 1,200 aia tam lo leh, Class XI leh XII-ah Rs. 1,500 aia tam lo a ni tur a ni.

Sikul kâi hun sawn hma ṭha tih chhante:
Experimential learning (a tak hmanga zir), dignity of labour (kut hnathawh zahawmna), value education, creativity (thil thar ngaihtuah chhuah theihna), reading and library services (lehkha chhiar tamna hun), health and physical education (hriselna leh taksa lam hmasawnna) etc. a awm theih nan.
India ram state 17-te school timing zir chianna neih a ni a, state lian leh hmasawn zual 10-te chuan zing dar 8 leh a aia hmaah sikul an ṭan vek a ni.
School timing sawn hma hian ṭhalaite nunah nasa taka thu sawiin, zan mut hma, zing thawh hma, hun hman ṭangkai kawngah nasa taka pui tura beisei a ni.
Kan ramah ni a chhuah hma avangin ni êng kan hmang ṭangkai rei thei ang a, hnathawh hun chhung a rei ang a, thawhchhuah a pung ang. Sikul bànah zirlaite'n hun thawl an ngah zawk ang a, infiamna leh thil ṭha hrang hrang zirna hun an ngah zawk ang, nu leh pate an ṭanpui tam thei ang. Zirlai ṭhenkhat remedial tea­ching/tuition mamawh tan ên laiin an ti thei ang a, naupang him nan a ṭha ang.
School timing sawn hma hi a hmangtu zirtirtu pawl hrang hrangte pawhin ṭha tiin, an thlawp hle. School timing sawn vanga sikul naupangte’n harsatna an tawh lohna turin city bus neitute leh Transport department-te pawhin bus timing siam remin, a ṭul angin hma an la dawn a ni.