Lal Thanzara'n lei pahnih a hawng

PWD enkawltu Lal Thanzara chuan March 27, 2015 khan Chhing­chhip-Hmunṭha kawnga Tuikum luia lei leh Chhingchhip-Thentlang kawnga Tuikual luia lei a hawng.

Lal Thanzara chuan, a ṭha lam zawnga mipui an inlungrual phawt chuan hmasawnna hna thawh a awlsam bik tih sawiin, "A thim a vár thlu loa chanchinbu lama insawisel vak vak chìn te, political party-te tan pawh mahni kutkawih a nih loh vanga sorkar hmalakna insawiselsak reng ringawt hi a ṭha lo," a ti a; mahni bil ngaihtuah loa mi chi hrang hrang awm khawm kan ni tih hriaa thu lái la deuha infinchhuah ṭhin a pawimawh tih a sawi.

Khualzahawm bialtu MLA Lal­rinawma pawhin thu sawiin, "Tui­kum rala chengte'n fur ah leh ṭhal­ah pawh buaina tawk tawh loin an thawhrimna rah, an thlai thar te leh thildang te hmunpui lamah an hralh ve reng thei tawh dawn a ni," a ti.

Tuikum lei leh Tuikual leite hi NLCPR hnuaia kum 2006-07 chhunga DoNER-in pawisa a pek chhuah aṭanga thawh a ni a, Mechfab Engineering Industries, Guwahati-te'n an dawh a ni. Tuikum lei atan cheng nuai 157.76 leh Tuikual lei atan nuai 184.62 ruahman a ni.