Governor Dr Aziz Qureshi bân a ni

Governor Dr Aziz Qureshi chu March 28, 2015 khan a hna aṭangin bàn a ni.

Mizoram Larsap hna thawk turin West Bengal Governor Keshri Nath Tripathi ruat a ni a, ani hian West Bengal leh Mizoram Larsap hna a kawp rih dawn a ni.

Dr Aziz Qureshi bànna thu President of India office-in a tihchhuah lai hian New Delhi-ah a zin a, nimin khan Aizawlah a rawn haw. Amah hi January 9, 2015-a Mizoram Larsap tura lak luh a ni.

Keshri Nath Tripathi hi July 2014 aṭanga Mizoram Larsap atana ruat parukna a ni. July 9, 2014 khan Larsap Vakkom Purushothaman chu sorkar laipuiin Nagaland Larsap ni tura a sawn vanga a bàn hnuah Mizoram a chhuahsan a;July 9-ah vek Gujarat Larsap Kamla Beniwal chu Mizoram Larsap atan lak luh a ni. Kamla Beniwal chu August 6, 2014 zanah sorkar laipuiin a bàn a, August 8-ah Mizoram larsap hna hmui turin Manipur larsap Vinod Kumar Duggal lak luh a ni.

August 24, 2014-ah Maharashtra larsap K Sankaranarayanan chu Mizorama awm tura ruat/sawn a ni a, mahse ani hi chuan rawn zawm loin a báng. A hnu lawkah VK Duggal pawh Larsap a nihna aṭangin a bang ve leh bawk. September 16, 2014-ah Meghalaya larsap Dr KK Paul chu Mizoram Larsap hna hmui tel turin lak luh a ni a; January 9, 2015-ah Dr Aziz Qureshi lak luh a ni leh bawk.