MZP-in marksheet lem siamah an puh

MZP hruaitute chuan, National Institute of Open Schooling (NIOS) hnuaia mi, Southern Higher Secondary School, Sikulpuikawn chuan marksheet lem an siam ṭhin niin an sawi.

MZP hruaitute hian Inrinni khan Aizawl Press Club-ah thuthar thehdarhtute an kâwm a; MZP president Lalhmachhuana chuan, "NIOS sikul ṭhenkhatin ṭhahnem­ngai taka zirlaite hmakhua ngaia zirna an kalpui laiin, sikul ṭhenkhat chuan zirlaite tan harsatna naménlo an thlen ṭhin. Southern HSS phei chuan zirlaite hnena senso tam tak an laksak hnuah marksheet lem siamin, result nei miah lo hnenah result lem leh document lem an pe chhuak ṭhin," a ti.

MZP president sawi danin, MZP-in result lem nei an hriat theih chin chu mi 28 an ni. Heng zirlaite admission fee, exam fee leh ṭul dang atan sikul thuneitute'n Rs. 500 an laksak a, ṭhenkhat chu exam fee atan Rs. 1,500 an chawitir leh a ni. Sikul ṭhenkhat chuan zirlaite hnenah exam laiin SMS hmanga a chhanna hrilh an nih tur thu sawiin, chuta tan chuan Rs. 500 an laksak ṭhin.

Lalhmachhuana chuan, MZP-in NIOS regional director Binod Doley an kawm ṭumnaah, NIOS hnuaia zirna chu a tláwm thei ang bera kalpui tur a nih thu a lo hrilh nia sawiin, "Rs. 2,000 bâk sên a ngai lo a, sen ṭulna pawh a awm loh thu min lo hrilh a ni," a ti.

MZP president chuan marksheet lem leh document lem siama zirlaite bumna lian tham Mizoramah a la thlen ngai loh thu sawiin, "Hnam dangte'n Mizoram zirna an hmuh dik loh phah mai ang tih kan hlau hle," a ti a; Southern HSS chu thu delhkilh awm loa an sikul khâr nghal tur leh zirlaite senso rûl tura an phût thu a sawi.

Southern HSS ang tho hian open school dangte kalphungah pawh thil fel lo a awm theih avangin a ṭul anga chhui chian zel an tum tih sawiin, Lalhmachhuana chuan, "Zirlaite hmakhua ngaiin thil dik lo tih chíng sikulte chu khâr an nih theihna atan hmalak zel kan tum," a ti.

MZP chuan Southern HSS lakah hian vawiinah Aizawl Police Station-ah FIR thehluh an tum a ni.