HPC(D) helte chêt dan an dem

Mizoram sorkar chuan thuchhuah siamin, March 28, 2015 zinga Zokhawthiang khaw dáiah HPC(D) mite'n MLA-te an lambunnaa police pathum an kap hlum leh mi dang paruk an kâp hliam chu a dem thu a puang. Political party leh pawl ṭhenkhatte'n an dem thu an tarlang bawk.

Sorkar thuchhuah chuan, "Ram hmasawnna tura thawktute lo lambun a, lo tibuai a, nunna hial lâk duhtute hi an demawm tak zet a ni. Sorkarin inberem tura theihtawpa hma a lak laia hetianga tharum thawh a ni hi a demawm chauh ni loin, a huatthlala tak zet a ni. Assembly session hnuhnung berah 'Zofate inpumkhatna dâltu chu engmah tih ni lo rawh se,' tih lungrual taka pass a nih laia hetiang tualthahna kan ram chhung ngeiah a thleng hi pawi a ti tak zet a, pawi khawitute hi Mizote leh Mizoram hmelmate an ni, sorkarin a dîm lo ang," a ti.

Mitthi chhungte sor­karin a tawrhpui thu leh hliamte sam chhuak thuai tura a duhsak thu a tarlang a, zangnadawm­na pang­ngai bakah, chhawm­dawlna awm thei ang ang sorkarin a ngaihtuah tur thu a tarlang bawk.

Central YMA chuan thu­chhuah siamin, HPC(D)-te thil tih an dem thu a tarlang a, "Mizoram ṭhen darh záwng leh Mizo hnam inpumkhatna tichhe thei zawnga hmalakna reng reng CYMA chuan a do tlat a ni, tiin, pawi khawihtute chu mana hrem an phût tlat thu an sawi.

Congress party, Congress party ṭhalaite leh MZP-te pawhin thu­chhuah siamin, HPC(D)-te chetna chu an dem tak zet thu te, mitthi chhungte an tawrhpui thu leh, hliamte dam chhuak thuai tura an duhsak thute an tarlang a ni.