Chapchar Kut hman dan thlir lêt CM-in ṭha leh changtlung zawka hman a duh

Nimin khan chief minister Lal Thanhawla hoin CMO conference room-ah kumina Chapchar Kut hman dan thlirlet a ni. Lal Thanhawla chuan Chapchar Kut chu ṭha zawk leh changtlung zawka hman theih dan ngaihtuah a ṭul thu a sawi.

Chief Minister chuan kum­ina Chapchar Kut hman dan sawi­selna leh rawtna hrang hrang a tam thu sawiin, "Hetihlai hian, kan hman ṭhat ber kum a nihna laite pawh a awm. Sawiselna hi duhthawna vang niin a lang a, a lamawmawm lamah ngai ila. Kan hman zel dan turah engtinnge ṭha zawk leh changtlung zawkin kan hman theih ang tih ngaihtuah a ngai a ni," a ti.

Sum hi duh ang tawk awm thei se chuan Chapchar Kut chu changtlung taka hman theih a nih a rinawm tih sawiin Lal Thanhawla chuan, "Naga-ten Hornbill Festival an neihte nen kan khaikhin a ni mai thei. Hmang ṭha anga an lanna chu sum an ngah vang a ni mai ," a ti a, sum a awm chuan thil tih a awlsam bik thu a sawi.

Lal Thanhawla chuan Mizo­rama kut hman dan chu rock concert ang mai nia sawi a awm thu sawiin, "Ni khat lek chhunga engkim tih kan tumna lamah a chawhchawrawi chu a ni ber a ni. Hornbill festival ang deuhin ni hnihah tal bithliah thiam ila kan ziaawm deuh a beiseiawm a ni," a ti.

Meeting-ah hian chanchinbu hrang hranga inziak Chapchar Kut hman dan sawiho a ni. An thusawiho ṭhenkhatte chu tleirawl zurui hmuh tur an tam tih te, western music rock concert ang mai tih te, kohhran pisa ṭhenkhatte an chawl ve lo, Anthurium Festival ah sum hman a tam zawk tih te, dar lam telh ve ni rawh se tih te, venhimna a tlem tihte leh programme a nawi tihte sawiho a ni.

Sawihona aṭang hian Chap­­char Kuta sum hman tur department tinin dah te, se­curity tihchak a ṭul thute leh Chapchar Kut mipuiin an hlut theihna atan Mizo lam emaw, Mizo nunphung tilang thei tur Chapchar Kut hmannia khawlaia tarte an rel a ni.

Kumin Chapchar Kut hmana­ah khan malzai 13, zaipawl pakhat leh beat group pathum an zai a, beat group hi chuan hla pakhat aia tam vek an sa. Mi panga - Chief Minister, Art & Culture Minister leh Cen­tral YMA President, NEZCC Director leh Taipei palai Chung Kwang Tien-te'n thu an sawi.

Mizo nunhlui pho chhuakte item - hlado, Mizo Pipu Zai, Mizo naupang inchei, pawnto, parlam, kut sa zawn, pipute ral beih dan leh costume show entir a ni. Hei bakah hian Mizo hnam hlam hrang hrang cheraw leh sarlamkai entir a ni.