Pawl hrang hrangin HPC(D) an dem

Mizoram Police Sub-Ordinate Association (MPSOA) chuan thuchhuah siamin, March 28, 2015-a HPC(D) mite'n ram hmasawnna hna thawktu tura kal MLA-te lo lambun a, anmahni vengtu police pathum an kâp hlum leh mi dang paruk an kap hliam chu an dem thu an tarlang.

MPSOA chuan, HPC(D)-te chu sorkarin na takin chháng lêt se an duh thu sawiin, "An phû tâwk hremna an hmuh ngei theihna atan theihtawp kan chhuah dawn a ni. Martarte thisen hi a thlawnin a luang lo ang," an ti a; nunna chán ta chhungte leh hliamte an tawrhpui tak zet thu leh a theih ang anga ṭanpuina pek an tum thu an tarlang.

Police kap hlumtute zingah police aṭanga tlanbo Malsawmkima a tel chu mak an tih thu sawiin MPSOA chuan, "Police zingah hian hetiang mi an lo inphûm ru thei pawh hi fimkhur lehzual a ngai tak zetin kan hria," an ti.

MPSOA tarlan danin, March 28-a helhoin police an kah hlumte tel lo hian HPC(D)-te'n kum 2007 aṭang khan police 10 leh civil mi pakua an kap hlum tawh a; police pakua leh civil mi pahnih an kah hliam tawh bakah, mi 27 an rubo tawh a ni.

MPC party, Mizo Students' Union, MHIP general headquarters leh Mizoram Martyr Family Association-te pawhin thuchhuah siamin, HP(D)-te'n MLA pathumte lo lambun a, police pathum an kâp hlum leh mi dang paruk an kap hliam chu an dem thu an tarlang.