KHAWTHLIR

Kawng khar dawn
PWD chuan thuchhuah siamin, Vaivakawn-Ropaiabawk via Zohnuai kawng chu VVIP a kal dawn avangin siamṭhat hna thawh a ni dawn tih an tarlang a, April 2 thleng lirthei kal phal a nih loh tur thu an puang.

Silai mû man
Champhaia CID-te chuan March 29 khan Engkhanchin, Ngaizawl in aṭangin AK-47 rifle mû 1,348 an man. Silai mû an man lai hian Engkhanchin chu a awm loh avangin a neitu hriat a ni lo. Silai mu man hi local market-ah Rs. 2,69,000 man vel a ni.

Ph.D hmu thar
F Lalfakawmi d/o F Vanenga, Champhai chuan Mizoram University aṭangin doctor of philosophy a hmu thar a, a thesis chu 'A Psychonalytical Study of Selected Mizo Fictions' tih a ni.

Induction meeting
IGNOU Study Centre 1901 (Govt. Aizawl College)-a zirlai lut tharte pualin March 28, 2015 khan induction meeting neih a ni a; khuallian GAC principal Lalrinawma chuan, zirlai tharte chu hlawhtling ngei tura theihtawp chhuah turin a fuih.

Glaucoma Week
District Blindness Control Society bultumin nimin khan Champhai district-a mite tan Champhai District Hospital-ah 'Glaucoma Week' hman ṭan a ni a, Glaucoma detection camp neih nghal a ni. Camp-ah hian mit lama harsatna nei mi 100 vel an inentir a, harsatna nei mi eng emaw zat hmuh chhuah a ni.

Office rawk
Tlangnuam RD block office chu Pathianni zan kha misualin an rawk a, account assistant steel almirah an karchhia a, NREGS pawisa Rs. 25,535 an ru He thil thleng chungchangah hian Kulikawn PS ah FIR thehluh a ni.

Inkap palh
Inrinni khan Hmunṭha khuaah mipa naupang pakhatin a ṭhianpa Zorema ulhbun silaiin a kap palh. Zorema hi Aizawl Civil Hospital panpui niin, Pathianni zan khan a hliam tuar loin a thi.