MNYF-in Health deptt. kal dan hrethiam lo
MNF ṭhalaite chuan nimin khan Aizawl Press Club-ah thuthar thehdarhtute an kâwm a; Health department kal dan ṭhenkhatin belhchian a dâwl loh thu leh hriatthiam harsa an tih thu an sawi.
MNF ṭhalai president K Vanlalvena chuan, Health department-in thisen sawngbawlna atana Rs. 550 an lâk chhan nia an sawi chu, NACO aṭanga Mizoramin pawisa a dawn ṭhin tihtawp vang leh blood bag an dawn tawh loh vang a nih thu sawiin, "Assembly session neih zawh taka Health Minister chhan danin, NACO aṭang hian Mizoram sorkarin kum 2013-14 ah cheng nuai 1365.42 leh kum 2014-15 (February) ah cheng nuai 1760.30 a hmu a ni," a ti a; blood bag pawh February 2, 2015-ah NACO-in Mizoram sorkar hnenah 8,530 a pek thu a sawi.
K Vanlalvena chuan, MNF sorkar laiin Mizorama PHC 57 zinga 56-ah doctor an awm vek niin a sawi a, "Doctor awm lohna PHC chu quarters sak zawh loh vang a ni. Congress an sorkar kum ruk hnuah Health Minister-in PHC 12-ah doctor an awm loh thu a sawi hi sorkarin Health department a ngaihthahnaah kan ngai," an ti.
K Vanlalvena tarlan danin, Health sub-centre-in ṭanpuina kum tin a dawn ṭhin (VHSF) Rs. 10,000 aṭangin Rs. 3,000-ah tihhniam a ni. United fund, sub centre-te hnena pek ṭhin pawh Rs. 30,000 aṭangin kumin khan Rs. 10,000 ah tihhniam a ni.