Andrew Lalherliana'n bàn a tum lo

MPSC chairman Andrew Lal­her­liana chuan, official document-a a pian kum chu October 7, 1953 a nih thu a sawi a, "MPSC chairman atan hian min ruattute'n chàwl tura min ti a nih loh chuan bàn ka tum lo," a ti.

Andrew Lalherliana hian nimin khan a pisaah thuthar thehdarhtute a kâwm a; MPSC chairman leh member chu a hun laia sorkarna chelhtuin an ruat ṭhin tih sawiin, "Political party zawng zawng, sorkar mek leh sorkarna la siam zel turte pawhin he mawhphurhna hi la chang thei vek a ni tih hriain, neitu rilru nen MPSC hi vawn zahawm i tum ṭheuh ang u," a ti a, MPSC chu politics-a inchirh theihna atana hman ni lo se a duh thu a sawi.

MPSC-a a awm chhungin candidate 2,322 aṭangin interview hmangin hna hrang hrang atan mi 573 lak an ni tawh tih sawiin, Andrew Lalherliana chuan, "Mi fel ka ni e tih puan ka tum lo, fel lohna ka nei ṭeuh ang. Mahse, MPSC-ah kher hi chuan theihtawp ka chhuah a, ka thawhpuite zarah thawk ṭha ka inti ve a ni," a ti.

Andrew Lalherliana chuan, MPSC chairman leh member atana ruat tawh zawng zawngte chu an hunlaia mi tling leh ṭhaa an ngaihte an nih avangin sawi pawr a ṭul lo tih sawiin, "MPSC member-te kan tehna ber tur chu an hna lak dan leh hnathawh record hi ni se," a ti a; party mi leh mimal duhsak bik an nei a nih chuan MPSC hotute chungah mipuiin an thîkthu tichhia se a duh thu a sawi.

Representation of the People Act anga a affadavit siam (Notarial Registration No 334/11) vanga thla ruk jail tàn leh pawisa chawi hlauhpuitu an awm nia sawiin, Andrew Lalherliana chuan, "Ka affidavit kha Representation of the People Act-in a phû anga dan bawhchhiatna kum hnih emaw, a aia rei lung-in tàn theihna thubuai ka nei lo tih leh pawi khawihna thubuaiah convict ka ni lo tih declare na mai a ni. Ka date of birth certifcate a ni lo a, jail tàn leh pawisa chawi phah a hlauhawm lo," a ti.

Andrew Lalherliana sawi dan­in, high school aṭanga a chung lam zawnga a document-a a pian kum tarlan chu October 7, 1953 a ni a, kum 1969-a Australia an pêm dawna a passport-a a pian kum pawh October 7, 1953 a ni. Delhi University leh NEHU-a a pian kum pawh October 7, 1953 tih a ni.

MLA candidate atana nimina­tion file laiin electoral roll mila form an fill up mai ṭhin thu sawiin Andrew Lalherliana chuan, "Docu­ment ṭhenkhata ka official age nena inmil chiah lote pawh a awm ta ngei a, chu chu duh tawh loin, kum 2009-ah electoral roll leh electoral ID siamṭhain, Assembly-ah pawh October 7, 1953-a piang tiin ex-MLA ID ka siamṭhattir a ni. MPSC-a ka luh dawn vanga ka pian kum hi siamṭhattir ka ni lo a, MPSC-ah ka lut ang tih pawh ka ngaihtuah phak ngai lo," a ti.

MPSC chairman chuan bân a tum loh thu sawiin, "Min ruattute'n báng tura min ti a nih erawh chuan second khat pawh inngaihtuah loin ka báng ang," a ti a, sorkarin a bàn loh chuan a term hman zawh ngei a tum thu a sawi.

Zawhna chhangin, Andrew Lalherliana chuan Synod Archive-a March 30, 1952-a baptisma chang anga tarlan a nih chungchangah hriat a neih loh thu a sawi a, official-a a pian kum ni lo, pian kum dik tak zawhna chu a chhang lo a ni.