Mizoramin kum 28 chhungin Larsap 15 a nei

Mizoramin February 20, 1987-a state dinhmun a neih hnuah Governor 15 a nei tawh a, March 28, 2015-a sorkar laipuiin a bân tak Dr Aziz Qureshi hi Mizoram larsap 15-na a ni.

Mizoram hi January 21, 1972-a Assam sorkar hnuai aṭanga Union Territory-a hlankai a nih hnuah, April 23, 1972 thleng chief commissioner SJ Das-a'n a enkawlna a a; April 24, 1972 aṭanga state a nih hma zawng chu lieutenant governor-in a enkawl a ni.

Lieutenant governor chenna chu Raj Niwas tih a ni a, Raj Niwas chu state nih hnua Governor puitlingin an awp hnuah Raj Bhavan tih a ni.

Mizoram lieutenant governor hmasa ber chu SP Mukherjee niin, April 24, 1972 aṭanga June 12, 1974 thleng a enkawl a; February 20, 1987-a state a nih ṭan laia lieutenant governor Hiteswar Saikia chu Governor hmasa ber a ni.

Mizoram hi state a nih hun kum 28 chhung hian Governor 15 an awm tawh. Governor term hi kum nga a ni a; Governor ni tawh mi 15 zinga pathum - PR Kyndiah, AR Kohli leh Lt.Gen. MM Lakhera te chiah­in an term (kum nga) an hmang zo. Mizoram Governor mi 15-te chu chawhrualin Mizoramah kum khat leh thla nga vel zel awm ang an ni.