MLA-in helho kah hliamte a kan

Mizoram Women Commission chairperson Vanlalawmpuii Chawng­thu, MLA chuan nimin khan March 28, 2015-a hel hoin Zokhawthiang inlam­bunnaa an kah hliam, Aizawl Civil Hos­pital-a enkawl mekte a kan a; thi ta chhungte a rál bawk.

Congress party ṭhalai president ni bawk Vanlalawmpuii Chawngthu leh inlambunnaa tel ve MPYCC joint secretary K Vanlalruati te chu nimin khan Congress Bhavan-ah Congress ṭhalaite'n thlahualna hun an hmanpui a ni.

Vanlalawmpuii Chawng­thu chuan, HPC(D)-te'n hmasawnna thlen tura kalte pawh zah zo loa silai nena beih an ni chu ná a tih thu leh tuar thiam har a tih thu a sawi a, a chuanna motor silai muin vawi 17 a déng fuh chunga hliam pawh tuar loa Pathianin a awmpui avangin a lawm thu a sawi bawk.