MLA fund nuai 100-ah tihsan a ni Tum 12 tihsan a ni tawh

Mizoram Legislative Assembly-a member 40-te'n an bial chhung hmasawnna atana sum an dawn chu kumin aṭangin a lêta tihpun a, cheng nuai 100 a ni tawh. Kum 2005-06 hnuah MLA fund hi ṭum 12 tihsan a ni tawh.

MLA fund hi kum 2005-06-ah Rs. 5,00,000-a bul ṭan a ni a, hei hi kum khat chhung atan a ni. MLA fund pek zat cheng nuai 50 chu kumin 2016-17 ah a leta tihpun niin, cheng nuai 100 a ni tawh a; kum kal mekah hian a zatve, cheng nuai 50 ṭheuh pek an ni tawh. Kum khatah ṭum hniha pek ṭhin an ni.

MLA fund hi kum khatah cheng nuai 100 a nih tak avangin sorkar chuan kum khatah MLA 40 tan cheng nuai 4,000 a sên a ngai dawn. Kum 2008-09 khan kum laklawhah tihsan a ni a, MLA zawng zawng tan nuai 600 aṭangin nuai 200 belhin, nuai 800-ah tihsan a ni.

MLA fund hman dan tur hi Planning & Programme Implementation department chuan kaihruaina fel takin a siam a, kaihhruaina hrilhfiah pawh an chhuah nawn fo tawh.

Sum hi MLA-te bial awmna DC pisa ṭheuhin an buaipui a, hna thawh tur mal bikah 75% lak chhuah nghal theih a ni a, tuna kaihruaina thar ber chu March 21, 2016 khan Planning Secretary-in a tichhuak.

Planning department hotute aṭanga thu dawn danin, MLA fund tia hriat lâr, Members of Legislative Assembly Local Area Development Scheme (MLALADS) hi sorkar chuan lapse lo turin a siam a, kaihhruainaah lapse thei lo a nih thu a inziak kher lo.

Fund pual hian account siamsak an ni a, Planning department chu Nodal department niin, implementing agency chu DC pisate an ni. Bank aṭangin account-ah ṭheuh sum a lut a, sum pek chhuah leh ṭul hrang hrang chu DC pisain an buaipui ṭhin.

Thu dawnnain an sawi danin, MLA fund hi cheng nuai 100-ah tisang mah se, state dangte khaikhinin a la tam lo a, India ram state zingah a tlem pawl a la nih thu thu an sawi a; MLA fund a tam hian hmasawnna hnathawh sem rualna atan a ṭangkai hle niin an sawi bawk.

MLALADS kaihhruaina siam thar ber, No. 2 sub. no. 2.1-ah chuan, MLA fund hman theih lohna tur chi thum tarlan a ni a; chungte chu - mimal hnathawhna atan te, political party leh sakhuana kaihhnawih pawl ho tante a ni. MLA fund hi leilung chhiatna a thlen changin MLA-te chuan an bial páwn lamah pawh an hmang thei a; MLA ṭanglai chu a báng emaw, a thi emaw a nih chuan, a hun laia rawtna a siam tawh chu MLA tharin a tidanglam tur a ni lo.

MLA fund hi kum khat atan siam ni mah se, a kumah kher sum pek chhuah ngei tur tih a awm lo a, recommend hi an duh hunah an ti thei thoa thu dawn a ni.

MLA fund tihsan tawh dan

(Rupees in lakh)

Kum MLA pakhat Total

tana fund

2005-06 5 200

2006-07 10 400

2007-08 15 600

2008-09 20 800

2009-10 25 1,000

2010-11 25 1,000

2011-12 25 1,000

2012-13 30 1,200

2013-14 30 1,200

2014-15 30 1,200

2015-16 50 2,000

2016-17 100 4,000