NOHP sum Rs. 5,00,000 bo thuah Mi pakhat bail pe; pakhat dilna hnâwl

National Health Mission (NHM) hnuaia National Oral Health Programme (NOHP) sum, Rs. 5,00,000 bo vanga NOHP hnuaia thawk K Hmingthanzauva'n anticipatory bail a dilna chu hnâwl a ni a; thawktu dang Lalrinkimi chu a hriselna ṭhat loh avangin anticipatory bail pek a ni thung.

National Oral Health Progra-mme sum bo chungchangah hian NHM mission director Dr K Lalbiak-zuala chuan June 10, 2016 khan Vaivakawn Poice Station-ah FIR a thehlut a; chhui a nih hnuah NOHP-a thawk pahnih - K Hmingthanzauva leh Lalrinkimi te chuan Court-ah anticipatory bail an dil a ni.

Anticipatory bail dilna hi Aizawl Addl. District & Sessions judge Vanlalenmawia'n ngaihtuahin, July 13, 2016 khan thutlukna a tichhuak a; thubuai chhuitute'n chak zawka hna an thawh theih nan K Hmingthanzauva bail dilna chu hnawl a nih thu a puang a, K Hmingthanzauva chu police-in manin, Central Jail-ah dah nghal a ni.

Lalrinkimi erawh chu a nau pâi kaihhnawihah a hriselna a ṭhat loh avangin Court chuan anticipatory bail a pe a; chutih rualin, thubuai chhuituite'n an duh hun apianga thu an zawhfiah theiha awm tur te, thubuai chhuina tibuai zawnga khawsa lo tur leh, Aizawl Chief Judicial Magistrate phalna tel loa Mizoram chhuahsan lo turin a hriattir. Court thu a zawm loh chuan anticipatory bail chu hlihsak nghal a nih tur thu hriattir a ni bawk.

Thu dawn danin, National Oral Health Programme sum hi thla tin endik ṭhin a ni a, May 2016 khan Vaivakawna State Bank of India-a an sum awm dan leh cashbook-a inziak an en milnaah, cheque hmangin Rs. 5,00,000 lak chhuah a ni tih hriat chhuah a ni.

NHM hotute chuan, NOHP sum chu joint account hmanga dah a nih thu sawiin, sum la chhuaktute'n cheque-ah joint account-a hming ziaktute ang hming phuahchawp ziakin Rs. 5,00,000 chu an la chhuak niin an sawi. Pawisa kim loh thu an hriat veleh NHM Mission Director chuan Vaivakawn PS-ah FIR a thehlut a ni.